មហាសេដ្ឋី Bill Gates បានផ្ទេរភាគហ៊ុនដែលមានតម្លៃជិត ២.៤ ពាន់លានដុល្លារទៅឱ្យលោកស្រី Melinda Gates នៅថ្ងៃតែមួយដែលពួកគាត់ទាំងពីរបានប្រកាសលែងលះ។ យោងតាមឯកសារ SEC បានឱ្យដឹងថា ក្រុមហ៊ុន Cascade Investment ដែលជាក្រុមហ៊ុនកាន់កាប់ និងគ្រប់គ្រងដោយក្រុមហ៊ុន Microsoft បានផ្ទេរភាគហ៊ុននៅក្នុងក្រុមហ៊ុនលក់រថយន្តធំបំផុតរបស់អាមេរិក ក្រុមហ៊ុន Coca-Cola bottler ក្រុមហ៊ុនប្រព័ន្ធផ្សព្វផ្សាយម៉ិកស៊ិក និងក្រុមហ៊ុនផ្លូវដែក ឱ្យទៅលោកស្រី Melinda Gates គ្រប់គ្រង។

ដូច្នេះឥឡូវនេះលោកស្រី បានកាន់កាប់ភាគហ៊ុន ៤.៧% នៅក្នុងក្រុមហ៊ុន Coca-Cola Femsa ដែលមានតម្លៃ ១២១ លានដុល្លារ និង ភាគហ៊ុន ៦.៧ ភាគរយនៅ Grupo Televisa ដែលមានតម្លៃ ៣៨៦ លានដុល្លារ។ ទាំងនេះ បានធ្វើឱ្យលោកស្រី Melinda ស្ថិតក្នុងចំណោមម្ចាស់ភាគហ៊ុនធំបំផុត នៅក្នុងក្រុមហ៊ុនយក្សទាំងពីររបស់ម៉ិកស៊ិក។

ជាមួយគ្នានេះឯកសារក៏បានបង្ហាញថា លោក Bill Gates ក៏បានយកកម្មសិទ្ធិមួយចំនួនរបស់លោកនៅក្នុង Canada National Railway and AutoNation ទៅឱ្យលោកស្រី Melinda ផងដែរ។ ភាគហ៊ុនចំនួន ១.៩% របស់លោកនៅក្នុងប្រព័ន្ធផ្លូវដែកដែលវែងជាងគេនៅកាណាដាមានតម្លៃ ១.៥ ពាន់លានដុល្លារ ខណៈភាគហ៊ុន ៣.៧% របស់លោកនៅក្នុងក្រុមហ៊ុនលក់រាយរថយន្តមានតម្លៃ ៣០៧ លានដុល្លារ គិតនៅក្នុងការបិទភាគហ៊ុនកាលពីថ្ងៃពុធ។

លើសពីនេះទៅទៀត មហាសេដ្ឋីវ័យចំណាស់រូបនេះ បានលក់ និងបរិច្ចាគ ភាគហ៊ុនភាគច្រើនរបស់គាត់នៅក្នុងក្រុមហ៊ុន Microsoft ដែលគាត់បានដំណើរការអស់រយៈពេលប្រហែលជា ៣៤ ឆ្នាំ។ បច្ចុប្បន្នគាត់ជាម្ចាស់ក្រុមហ៊ុនបច្ចេកវិទ្យា ១% ហើយមានតម្លៃប្រមាណ ១៤៤ ពាន់លានដុល្លារ នេះបើយោងតាមទីភ្នាក់ងារព័ត៌មាន Bloomberg ។

គួរបញ្ជាក់ផងដែរថា សប្បុរសជនដែលជាមហាសេដ្ឋីបានចំណាយទ្រព្យសម្បត្តិជាច្រើននៃចំនួន ១៣០ ពាន់លានដុល្លារអាមេរិកសម្រាប់ការបរិច្ចាគតាមរយៈមូលនិធិ Bill and Melinda Gates។ ប្តីប្រពន្ធមួយគូនេះមិនដែលបានចុះកិច្ចព្រមព្រៀងគ្នាជាមុនទេ ប៉ុន្តែពួកគេនឹងបែងចែកទ្រព្យសម្បត្តិ និងបំណុលរបស់ពួកគេក្រោមលក្ខខណ្ឌដែលមានចែងនៅក្នុង“ កិច្ចសន្យាលែងលះគ្នា” ។ ជាមួយគ្នានេះនៅក្នុងឯកសារលែងលះរបស់ពួកគេ លោកស្រី Melinda Gates មិនបានទាមទារការចែកចំណែកទ្រព្យពីប្តីទេ៕

អត្ថបទ៖ លីនី
ប្រភព៖ businessinsider