ការកើនឡើងនៃការឆ្លងជំងឺរាតត្បាត Covid-19 នៅក្នុងប្រទេសកំពុងអភិវឌ្ឍន៍ដូចជា ឥណ្ឌាចំពេលមានការផ្គត់ផ្គង់វ៉ាក់សាំងតិចតួចមានន័យថា ជំងឺរាតត្បាតនឹងបន្តរីករាលដាលរហូតដល់ពាក់កណ្តាលឆ្នាំ ២០២២ នេះបើយោងតាមប្រសាសន៍របស់អ្នកបង្កើតវ៉ាក់សាំង Covid-19 ដំបូងបង្អស់ដែលត្រូវបានអនុញ្ញាតនៅភាគខាងលិច។
ស្ថាបនិក BioNTech SE នៅឯកិច្ចប្រជុំក្រុមប្រឹក្សានាយកប្រតិបត្តិកាសែត The Wall Street Journal បាននិយាយថាដោយសារតែភាពបន្ទាន់អាជ្ញាធរគួរតែពិចារណាលើវិធានការដូចជាការលាយនិងការចាក់វ៉ាក់សាំងដែលត្រូវគ្នាពីក្រុមហ៊ុនផលិតផ្សេងៗគ្នា។ លោក Ugur Sahin នាយកប្រតិបត្តិក្រុមហ៊ុន BioNTech មានប្រសាសន៍ថា៖ “ យើងត្រូវធានាឱ្យបាននូវអត្រាចាក់វ៉ាក់សាំងខ្ពស់ ទូទាំងពិភពលោក បើមិនដូច្នោះទេគ្មាននរណាម្នាក់នឹងមានសុវត្ថិភាពទេ”។
ជាមួយគ្នានោះលោកបានបញ្ជាក់ថា ជំងឺរាតត្បាតនឹងបញ្ចប់ នៅពេលដែលបណ្ដុំភាពស៊ាំត្រូវបានកើតមាននៅក្នុងខ្លួនប្រជាជននៅទូទាំងពិភពលោក។ នៅពាក់កណ្តាលឆ្នាំ ២០២២ សូម្បីតែតំបន់ដែលមានប្រជាជនដង់ស៊ីតេខ្ពស់ដូចជាឥណ្ឌា នឹងទទួលបានអត្រាខ្ពស់នៃការចាក់ថ្នាំបង្ការ និងបណ្ដុំភាពស៊ាំ។
លើសពីនេះទៅទៀត លោកបានបន្តថា យើងនឹងឃើញថានៅក្នុងរយៈពេល ១២ ខែទៀតចំនួននៃការកើនឡើងនៃប្រទេសឧស្សាហកម្មកំពុងអភិវឌ្ឍន៍ និងប្រទេសដែលមានប្រាក់ចំណូលទាបឈានដល់ការសម្រេចបាននៃបង្កើតបណ្ដុំភាពស៊ាំសម្រាប់ប្រជាជន ដោយគ្រាន់តែបង្កើនសមត្ថភាពផលិតរបស់អ្នកផលិតវ៉ាក់សាំងដែលមានស្រាប់ និងបន្ថែមកន្លែងផលិតកម្មថ្មីៗ។
មិនតែប៉ុណ្ណោះ លោកវេជ្ជបណ្ឌិត Sahin ដែលបានបង្កើតក្រុមហ៊ុនជាមួយភរិយារបស់គាត់គឺលោកស្រី Ozlem Tureci បានមានប្រសាសន៍ថា ពួកគេកំពុងពង្រីកសម្ព័ន្ធភាពផលិតកម្មរបស់ខ្លួនចំនួន ៣០ ក្រុមហ៊ុនបន្ថែមទៀត ដើម្បីផលិតវ៉ាក់សាំងបន្ថែមទៀតដល់ដើម្បីផ្គត់ផ្គង់ដល់ប្រទេសជាច្រើនដូចជា ប្រទេសឥណ្ឌាជាដើម៕
អត្ថបទ៖ លីនី
ប្រភព៖ bangkokpost