នៅពេលដែលលោក Bob Iger បានក្លាយជានាយកប្រតិបត្តិរបស់ក្រុមហ៊ុន The Walt Disney ក្នុងឆ្នាំ២០០៥ គាត់មានគំនិតប្រថុយប្រថានមួយគឺទិញ Pixar ។ លោក Iger បានថ្លែងក្នុងបទសម្ភាសន៍មួយជាមួយទស្សនាវដ្តី The David Rubenstein Show របស់សារព័ត៌មាន Bloomberg ថា៖ « នៅពេលនោះស្ទូឌីយោជីវចល Walt Disney បានធ្លាក់ចុះខ្លាំង ក្រុមហ៊ុន Pixar និង Disney បានបណ្តាក់ទុនរួមគ្នាដើម្បីផលិតខ្សែភាពយន្តរបស់ Pixar រួមទាំងខ្សែភាពយន្តល្បីដូចជារឿង“ Toy Story”​ “ Monsters, Inc. ” និង “Finding Nemo” ។ ប៉ុន្តែ Steve Jobs ដែលជាស្ថាបនិកក្រុមហ៊ុន Apple និង Pixar បាននិយាយជាសាធារណៈក្នុងឆ្នាំ២០០៤ ថាទំនាក់ទំនងរវាង Pixar និង Disney កំពុងតែត្រូវបានបញ្ចប់ ពីព្រោះក្រុមហ៊ុនមិនអាចយល់ព្រមលើកិច្ចព្រមព្រៀងចែកចាយ។

លោកបានលើកឡើងនៅក្នុងបទសម្ភាសន៍របស់ទីភ្នាក់ងារព័ត៌មាន Bloomberg ថា៖ « ដោយឃើញថា Disney Animation ត្រូវការការកែលំអរយ៉ាងខ្លាំង លោកគិតថាវិធីលឿនបំផុតដើម្បីសំរេចគោលដៅ ទោះបីវាជាការប្រថុយប្រថាននិងថ្លៃបំផុតក៏ដោយនោះ គឺត្រូវទិញ Pixar។ ហើយមុនពេលទៅក្រុមប្រឹក្សាភិបាលរបស់ Disney លោក Iger ត្រូវតែបញ្ចុះបញ្ចូល Steve Jobs ជាមុនសិន។ លោក Iger បាននិយាយថា៖ « នៅពេលគំនិតនៃការទិញក្រុមហ៊ុន Pixar ត្រូវបានផ្ដើមឡើង ខ្ញុំបានទូរស័ព្ទទៅលោក Jobs ពេលនោះខ្ញុំភ័យណាស់ ប៉ុន្តែវាជាការល្អបំផុតដែលខ្ញុំបាននិយាយជាមួយគាត់ផ្ទាល់ ហើយគ្រានោះខ្ញុំបាននិយាយប្រាប់គាត់ថា ខ្ញុំមានគំនិតឆ្កួតៗចង់ពិភាក្សាជាមួយគាត់ »។

នាយកប្រតិបត្តិរបស់ក្រុមហ៊ុន The Walt Disney រូបនេះបានបន្តថា អ្នកដែលស្គាល់លោក Steve Jobs នឹងដឹងថាប្រសិនបើអ្នកនិយាយទៅកាន់គាត់ថាអ្នកមានគំនិតឆ្កួតៗ គាត់នឹងចាប់អារម្មណ៍អ្នក ហើយចាំស្ដាំថាតើវាគឺជាអ្វី។ ជាការពិតណាស់ Jobs បានស្នើសុំឱ្យលោក Iger ប្រាប់គាត់ពីគំនិតរបស់គាត់ក្នុងកិច្ចសន្ទនាតាមរយៈទូរស័ព្ទ។ ក្រោយសន្ទនា និងបានណាត់ជួបគ្នាដើម្បីពិភាក្សាយ៉ាងតឹងរឹង ទីបំផុត Disney បានទិញ Pixar ក្នុងតម្លៃ ៧.៤ ពាន់លានដុល្លារក្នុងឆ្នាំ ២០០៦។ ខណៈនោះ Jobs បានក្លាយជាសមាជិកក្រុមប្រឹក្សាភិបាលរបស់ Disney និងជាម្ចាស់ភាគហ៊ុនធំបំផុតរបស់ក្រុមហ៊ុន។

នៅពេលដែល Jobs បានទទួលមរណភាពដោយសារជំងឺមហារីកលំពែងក្នុងឆ្នាំ ២០១១ ភរិយារបស់គាត់ឈ្មោះ Laurene Powell Jobs បានទទួលភាគហ៊ុនចំនួន ១៣៨ លានហ៊ុនរបស់ Disney ។ នៅឆ្នាំ ២០១៧ ការជឿទុកចិត្តដែលគ្រប់គ្រងដោយ Powell Jobs បានកាត់បន្ថយការកាន់កាប់របស់ខ្លួនមកនៅត្រឹម ៤% ។ ចំណែកឯលោក Iger បានលាឈប់ពីតំណែងជានាយកប្រតិបត្តិក្រុមហ៊ុន Disney ក្នុងខែកុម្ភៈ៕

អត្ថបទ៖ លីនី
ប្រភព៖ cnbc