យោងតាមសន្ទស្សន៍មហាសេដ្ឋីរបស់ Bloomberg កាលពីថ្ងៃអង្គារម្សិលមិញនេះ លោក Elon Musk ស្ថាបនិកក្រុមហ៊ុនផលិតរថយន្តដ៏ល្បីគឺ Tesla បានក្លាយជាអ្នកមានបំផុតទី២ នៅលើពិភពលោក ដោយបានទម្លាក់លោក Bill Gates ចេញពីតំណែង ប៉ុន្តែមហាសេដ្ឋីវ័យក្មេងរូបនេះ នឹងមិនអាចយកឈ្នះលើអ្នកជំនួញជើងចាស់ Bill Gates បានឡើយប្រសិនបើ លោក Gates មិនបានបរិច្ចាគទ្រព្យសម្បត្តិរបស់គាត់ចំនួន ២៦ ពាន់លានដុល្លារទៅឲ្យមូលនិធិ Bill & Melinda Gates ដែលបានបង្កើតឡើងនៅក្នុងឆ្នាំ២០០៦។ នេះបើយោងតាមការចុះផ្សាយពីរបស់សារព័ត៌មាន entrepreneur។

តាមប្រភពដដែលបានឲ្យដឹងថា មហាសេដ្ឋីសញ្ជាតិកាណាដា Elon Musk បានបង្កើនទ្រព្យសម្បត្តិ ដល់ទៅ ១២៧.៩ ពាន់លានដុល្លារ ដោយសារតែការកើនឡើងតម្លៃភាគហ៊ុនរបស់ក្រុមហ៊ុនផលិតរថយន្តអគ្គិសនីលំដាប់ខ្ពស់ Tesla ៦.៥៨%។ ចំនួននេះបានកើនលើសទ្រព្យសម្បត្តិរបស់សេដ្ឋីចិត្តធម៌ Bill Gates តែ​ ២០០ លានដុល្លារតែប៉ុណ្ណោះ ខណៈបច្ចុប្បន្នគាត់មានទ្រព្យសម្បត្តិសរុបចំនួន ១២៧.៧ លានដុល្លារ។ យ៉ាងណាមិញនេះ មិនមែនជាលើកទីមួយទេ ដែលលោក Bill Gates បានធ្លាក់ចេញពីតំណែងមហាសេដ្ឋីលំដាប់ទី២ នៅលើពិភពលោក ហើយតាមពិតទៅគាត់នឹងមានទ្រព្យសម្បត្ដិច្រើនជាងទ្រព្យសម្បត្តិដែលគាត់មាននាពេលបច្ចុប្បន្ននេះ ប្រសិនបើគាត់មិនបានបរិច្ចាគទៅឱ្យមូលនិធិ Bill & Melinda Gates៕

អត្ថបទ៖ លីនី
ប្រភព៖ entrepreneur