មនុស្សគ្រប់គ្នាតែងយល់ឃើញថា មហាសេដ្ឋីភាគច្រើនតែងមានទម្លាប់ និងរបៀបរបបបែបអ្នកមានស្រដៀងៗគ្នា ជាពិសេសគឺមហាសេដ្ឋីក្នុងសម័យទំនើបនេះតែម្ដង។ ផ្ទុយទៅវិញមហាសេដ្ឋីហុងកុង លី កាស៊ីង​ មិនដូចមហាសេដ្ឋីដទៃនោះទេ​ គាត់ជាមនុស្សស្ងៀមស្ងាត់ និយាយទន់ភ្លន់ មិនយកចិត្តទុកដាក់ចំពោះវិធីសាស្រ្តរបស់គាត់ក្នុងការធ្វើអាជីវកម្ម ហើយគាត់ប្រហែលជាបុរសសន្សំសំចៃបំផុតដែលអ្នកមិនធ្លាប់បានជួប។

ប៉ុន្តែកុំឲ្យអាកប្បកិរិយាមិនចេះធុញទ្រាន់បោកបញ្ឆោតអ្នក នៅក្នុងពិភពធុរកិច្ចលោក លី ត្រូវបានគេចាត់ទុកថាជា “ Superman” សម្រាប់អារម្មណ៍ និងសមត្ថភាពអាជីវកម្មដ៏អស្ចារ្យរបស់គាត់។ គិតត្រឹមដើមឆ្នាំ២០១៨ លោក លី ត្រូវបានគេជឿជាក់ថាជាអ្នកមានជាងគេទី២៣ នៅលើពិភពលោក ដែលមានទ្រព្យសម្បត្តិសរុបប្រមាណ ៣៧.៧ ពាន់លានដុល្លារអាមេរិក។ អាណាចក្រជំនួញរបស់គាត់ត្រូវបានបែងចែករវាងក្រុមហ៊ុនកាន់កាប់ពីរគឺ CK Hutchison Holdings និង Cheung Kong Holdings ។

ក្នុងមួយជីវិតរបស់គាត់ គាត់ទទួលបានងារជាបុរសមានបំផុតនៅហុងកុង ហើយនៅឆ្នាំ ២០០០ គាត់ត្រូវបានគេដាក់ឈ្មោះថា ជាបុរសដែលមានឥទ្ធិពលបំផុតនៅអាស៊ី ដោយ Asia week។ ហើយនៅឆ្នាំ ២០០៦ គាត់ត្រូវបានផ្តល់កិត្តិយសដោយទស្សនាវដ្តី Forbes ជាមួយនឹងពានរង្វាន់សមិទ្ធផលពេញមួយជីវិតរបស់ Malcolm S. Forbes។ ភាពជោគជ័យទាំងអស់នេះ បានរំលេចចេញនូវមេរៀនជំនួញដ៏សំខាន់ចំនួន ៣ ខាងក្រោមនេះ ដែលដកស្រង់ចេញពីជីវិត និងអាជីពរបស់​គាត់​ សម្រាប់អ្នកដែលព្យាយាមដើរតាមមាគ៌ារបស់គាត់៖

មេរៀនទី១៖ ធ្វើកិច្ចការផ្ទះរបស់អ្នក៖ ពាក្យថាកិច្ចការផ្ទះនេះសំដៅទៅលើលំហាត់ដែលគ្រូដាក់ឲ្យ មិនមែនកិច្ចការងារបោសជូតផ្ទះនោះទេ។ លោក លី ត្រូវបានបញ្ជូនទៅសិក្សានៅហុងកុងពេលគាត់នៅក្មេង ហើយក្រោយមកឪពុករបស់គាត់បានស្លាប់នៅពេលដែលគាត់មានអាយុត្រឹមតែ ១២ ឆ្នាំប៉ុណ្ណោះ។ ក្រោយឪពុកស្លាប់ លោកបានចូលធ្វើការនៅរោងចក្រផ្លាស្ទិក ដើម្បីរកប្រាក់ចិញ្ចឹមគ្រួសារ ដោយធ្វើការចន្លោះពី ១៦ ទៅ ២០ ម៉ោងក្នុងមួយថ្ងៃ។ ក្នុងអំឡុងពេលធ្វើការ លី បានរៀនសូត្រពីអាជីវកម្មផ្លាស្ទិកជាច្រើន គាត់តែងអនុវត្ត និងអានសៀវភៅ ឬ ទស្សនាវដ្ដីពាក់ព័ន្ធនឹងការងារដែលខ្លួនបានធ្វើនៅផ្ទះ មិនយូរប៉ុន្មានចំណេះក៏កើន ជំនាញក៏មាន រួមផ្សំសន្សំប្រាក់ពីប្រាក់ខែ និងខ្ចីសាច់ញាតិខ្លះ គាត់បានចាប់ផ្ដើមអាជីវកម្មដោយខ្លួនឯងទទួលបានជោគជ័យលើសពីការរំពឹទុក។

មេរៀនទី២៖ ការពង្រីកខ្លួន ត្រូវតែឆ្លាត និងមានតុល្យភាព៖ ការលះបង់របស់គាត់ក្នុងការរៀនអ្វីៗគ្រប់យ៉ាង ដែលគាត់អាចធ្វើបានអំពីឧស្សាហកម្មរបស់គាត់បាននាំឲ្យមានការរីកចម្រើនគួរឲ្យកត់សម្គាល់ក្នុងរយៈពេលខ្លី។ ចំពោះលទ្ធផលនេះ លោក លី បានមានប្រសាសន៍ថា៖ « អាជីវកម្មរបស់ខ្ញុំមានការរីកចម្រើនយ៉ាងឆាប់រហ័ស នៅពេលខ្ញុំមានអាយុចន្លោះពី ២៧ឆ្នាំ ទៅ ៣០ឆ្នាំ។ ខ្ញុំក្លាយជាអ្នកមានមុនខ្ញុំអាយុ ៣០ឆ្នាំ ហើយមានអ្វីៗគ្រប់យ៉ាងដែលគ្រួសារខ្ញុំ និងខ្ញុំត្រូវការសម្រាប់ពេញមួយជីវិតរបស់ពួកយើង »។ ទោះបីជាទទួលបានជោគជ័យយ៉ាងឆាប់រហ័សក៏ដោយ ក៏គាត់ដឹងច្បាស់ជាងការពង្រីកយ៉ាងរហ័សដើម្បីទទួលបានប្រយោជន៍។ ជាក់ស្ដែងមហាសេដ្ឋីរូបនេះចូលចិត្តប្រើវិធីប្រុងប្រយ័ត្ន ដូច្នេះនៅពេលឱកាសត្រឹមត្រូវបង្ហាញខ្លួន គាត់នឹងធ្វើការវាយឆ្មក់។ លោកបានមានប្រសាសន៍ថា៖ « វាជាទំលាប់របស់ខ្ញុំ ដែលខ្ញុំតែងតែប្រយ័ត្នជាមួយលំហូរសាច់ប្រាក់របស់ខ្ញុំ នោះមានន័យថាខ្ញុំមានដើមទុនបន្ថែម ដើម្បីចូលទៅក្នុងឧស្សាហកម្មមួយផ្សេងទៀតនៅពេលណាដែលខ្ញុំចង់ធ្វើ »។ ឱកាសដែលបានយកអាណាចក្រជំនួញរបស់ លី កាស៊ីងឈានដល់កម្រិតបន្ទាប់បានកើតឡើងក្នុងឆ្នាំ១៩៧៩ អំឡុងពេលនោះគាត់បានទិញផ្ទះជំនួញអង់គ្លេសចាស់ Hutchison ដែលនេះជួយបង្កើនទ្រព្យ និងឥទ្ធិពលដល់គាត់យ៉ាងខ្លាំង។ លើសពីនេះគាត់បានទិញភាគហ៊ុនគ្រប់គ្រងអាជីវកម្មពីក្រុមហ៊ុន HSBC ដែលបានជួយធានាក្រុមហ៊ុន ខណៈដែលខ្លួនកំពុងប្រឈមនឹងបំណុលដ៏ច្រើន។ នេះជាលើកទីមួយហើយដែលប្រជាជនចិនបានកាន់កាប់ក្រុមហ៊ុនអង់គ្លេស ហើយវាបានកត់សម្គាល់នូវពេលវេលាដ៏សំខាន់មួយនៅក្នុងការផ្លាស់ប្តូររចនាសម្ព័ន្ធថាមពលរបស់ហុងកុង។ គាត់បានរង់ចាំជាយូរមកហើយ ដើម្បីធ្វើការផ្លាស់ប្តូរដ៏ធំបែបនេះ។ ក្នុងការធ្វើដូច្នេះ វាតំណាងឱ្យតុល្យភាពល្អដែលគាត់ដើររ វាងការពេញចិត្ត និងការឈ្លោះប្រកែក។ លោកបានលើកឡើងថា៖ « ខ្ញុំតែងតែមានគោលការណ៍នេះក្នុងដំណាក់កាលអភិវឌ្ឍន៍កុំភ្លេចស្ថេរភាព នៅពេលមានស្ថេរភាពកុំភ្លេចការអភិវឌ្ឍ តុល្យភាពបែបនេះពិតជាសំខាន់ណាស់ »។

មេរៀនទី៣៖ កុំភ្លេចសារៈសំខាន់នៃការបន្ទាបខ្លួននិងសន្សំសំចៃ៖ មួយក្នុងចំណោមអាកប្បកិរិយាផ្ទាល់ខ្លួនដែលគួរឲ្យកត់សម្គាល់បំផុតរបស់លោក លី កាស៊ីង គឺភាពសន្សំសំចៃដ៏ល្បីល្បាញរបស់គាត់។ ខណៈពេលដែលនាយកប្រតិបត្តិ មហាសេដ្ឋី ភាគច្រើនមានសម្លៀកបំពាក់ ស្បែកជើង ឡាន និងនាឡិកាដ៏ប្រណិតនិងមានតម្លៃថ្លៃៗ លោក លី មិនស្ថិតនៅក្នុងចំណោមពួកគេទេ។ មហាសេដ្ឋីរូបនេះតែងប្រើប្រាស់សម្ភារៈតម្លៃថោកៗ ដើម្បីបញ្ជាក់ពីភាពសាមញ្ញរបស់គាត់។ ចំពោះចំណុចនេះ លោក លី បានពន្យល់ថា៖ « ឧបមាថានាឡិកាដែលខ្ញុំពាក់មានតម្លៃ ១០ ម៉ឺនដុល្លារ ខ្ញុំចាំបាច់ត្រូវប្រយ័ត្ន។ ប៉ុន្តែនេះ គឺជាប្រាក់ពីរបីរយដុល្លារអាមេរិក ដូច្នេះខ្ញុំអាចលេងកូនហ្គោលខ្ញុំអាចហែលទឹកបាន ខ្ញុំអាចហាត់ប្រាណបាន ហើយខ្ញុំមិនចាំបាច់ប្រយ័ត្នប្រយែងទេ »។ ភាពសន្សំសំចៃរបស់គាត់មិនត្រឹមតែជាការអនុវត្តជាក់ស្តែងប៉ុណ្ណោះទេ វាបានបង្ហាញពីឥរិយាបទដែលអ្នកគួរតែបង្ហាញទាំងនៅពេលដែលអ្នកកំពុងសម្រេចគោលដៅ និងបន្ទាប់ពីទទួលបានជោគជ័យមួយកំរិត។ ជាមួយគ្នានេះ អ្នកមានបំផុតនៅហុងកុងបានណែនាំថា៖ « ព្យាយាមទិញសម្លៀកបំពាក់ និងស្បែកជើងតិចបំផុត។ សន្សំលុយរបស់អ្នកហើយទិញអំណោយសម្រាប់មនុស្សជាទីស្រឡាញ់របស់អ្នក ហើយប្រាប់ពួកគេពីផែនការ និងគោលដៅហិរញ្ញវត្ថុរបស់អ្នក។ ប្រាប់ពួកគេពីមូលហេតុដែលអ្នកពិតជាអស្ចារ្យ។ ប្រាប់ពួកគេពីការប្រឹងប្រែងទិសដៅនិងក្តីសុបិន្តរបស់អ្នក»។

អត្ថបទ៖ លីនី
ប្រភព៖ tharawat