វេជ្ជបណ្ឌិត Shigeaki Hinohara មានជីវិតដ៏អស្ចារ្យដោយសារហេតុផលជាច្រើន ដោយចាប់ផ្ដើមដំបូងជាគ្រូពេទ្យ និងអ្នកជំនាញ ដែលមានអាយុវែង រស់នៅរហូតដល់អាយុ ១០៥ឆ្នាំ។ នៅពេលគាត់ទទួលមរណភាពនៅក្នងឆ្នាំ២០១៧ លោក Hinohara គឺជាប្រធានក្រុមសាកលវិទ្យាល័យអន្ដរជាតិ St.Luke និងជាប្រធានកិត្តិយសនៃមន្ទីរពេទ្យអន្ដរជាតិ St. Luke នៅទីក្រុងតូក្យូ។
មិនត្រឹមមុខងារ ឋានៈនោះទេ ដែលធ្វើឲ្យគាត់ល្បីល្បាញ គឺមានរឿងមួយទៀតដែលធ្វើឲ្យមនុស្សគ្រប់គ្នានៅក្នុងប្រទេសជប៉ុនស្គាល់គាត់នោះគឺសៀវភៅដែលជាការនិពន្ធរបស់គាត់ដែលមានឈ្មោះថា៖ « រស់នៅល្អ គឺរស់បានយូរ »។ វេជ្ជបណ្ឌិត Hinohara បានផ្ដល់ដំបូន្មានដែលជួយធ្វើឲ្យប្រទេសជប៉ុនក្លាយជាមេដឹកពិភពលោកដែលមានអាយុវែង។ យ៉ាងណាមិញខាងក្រោមនេះ ជាដំបូន្មានមួយចំនួនរបស់គាត់៖
១.កុំចូលនិវត្តន៍ ប៉ុន្តែបើសិនជាអ្នកមិនអាចធ្វើបាន គួរចូលនិវត្តន៍នៅពេលអាយុលើសពី ៦៥ឆ្នាំ៖ អាយុកាលចូលនិវត្តន៍ជាមធ្យមយ៉ាងហោចណាស់នៅសហរដ្ឋអាមេរិកតែងតែមានអាយុប្រហែល ៦៥ ឆ្នាំ ហើយក្នុងប៉ុន្មានឆ្នាំថ្មីៗនេះ មានមនុស្សជាច្រើនបានប្រកាន់ការចូលនិវត្តន៍មុនអាយុដោយផ្អែកលើស្ថានភាពហិរញ្ញវត្ថុ។ ប៉ុន្តែលោក Hinohara មានទស្សនៈខុសពីនេះ លោកបាននិយាយនៅក្នុងបទសម្ភាសន៍មួយនៅឆ្នាំ២០០៩ ជាមួយកាសែតជប៉ុនថា មិនចាំបាច់ចូលនិវត្តន៍ទេ ប៉ុន្តែប្រសិនបើចាំបាច់ត្រូវតែចូលលើសពីអាយុ ៦៥ ឆ្នាំ។ អាយុចូលនិវត្តន៍នាពេលបច្ចុប្បន្នត្រូវបានកំណត់នៅ ៦៥ ខណៈកន្លះឆ្នាំមុនអាយុកាលជាមធ្យមនៅជប៉ុនមានអាយុ ៦៨ឆ្នាំ ហើយមានតែជនជាតិជប៉ុន ១២៥ ប៉ុណ្ណោះ នាក់ មានអាយុលើស ១០០ឆ្នាំ។ លោកបានពន្យល់ថា នេះធ្វើឲ្យប្រជាជនរស់នៅបានយូរ ខណៈ អាយុកាលជាមធ្យមសម្រាប់សហរដ្ឋអាមេរិកនៅឆ្នាំ២០២០ មានអាយុកាល ៧៨ ឆ្នាំ គឺកើនឡើង ០.០៨% ពីឆ្នាំ២០១៩ ដូច្នេះយើងគួរតែចូលនិវត្តន៍ក្នុងអាយុកាន់តែច្រើន កាន់តែល្អ។ ជាក់ស្ដែងលោកពិតជាបានអនុវត្តអ្វីដែលគាត់បានផ្សព្វផ្សាយ៖ រហូតដល់ពីរបីខែមុនពេលគាត់ស្លាប់ គាត់បានបន្តព្យាបាលអ្នកជំងឺ រយៈពេល ៥ ឆ្នាំទៀត ហើយធ្វើការរហូតដល់ ១៨ ម៉ោងក្នុងមួយថ្ងៃ។
២.ធ្វើលំហាត់ប្រាណ និងរក្សាទំងន់អ្នកឲ្យថេររហូត៖ វេជ្ជបណ្ឌិតរូបនេះបានសង្កត់ធ្ងន់លើសារៈសំខាន់នៃការធ្វើលំហាត់ប្រាណទៀងទាត់ ដោយបាននិយាយថា គាត់ធ្វើលំហាត់ប្រាណពីរផ្សេងគ្នាក្នុងពេលតែមួយ ដើម្បីធ្វើចលនាសាច់ដុំ។ លើសពីនេះទៀតលោកតែងតែកាន់កញ្ចប់ និងឥវ៉ាន់ផ្ទាល់ខ្លួន ហើយបានផ្តល់ការបង្រៀនចំនួន ១៥០ ដងក្នុងមួយឆ្នាំ ដែលជាធម្មតាត្រូវប្រើប្រាស់ការនិយាយរយៈពេល ៦០ ទៅ ៩០ នាទី។ ជាមួយគ្នានេះគាត់ក៏បានចង្អុលបង្ហាញផងដែរថា អ្នកដែលរស់នៅបានយូរអង្វែងមានភាពដូចគ្នាគឺ៖ ពួកគេមិនធាត់ពេកទេ ហើយជាការពិតភាពធាត់ត្រូវបានគេចាត់ទុកថា ជាទូទៅគឺជាកត្តាហានិភ័យដ៏សំខាន់បំផុតមួយ សម្រាប់ការកើនឡើងអត្រានៃការកើតជំងឺ និងអត្រាស្លាប់។
៣. ស្វែងរកគោលបំណង ដែលធ្វើឱ្យអ្នករវល់៖ យោងតាមវេជ្ជបណ្ឌិតអាយុវែងរូបនេះបានឲ្យដឹងថា ការដែលអ្នកមានពេលទំនេរច្រើនធ្វើឲ្យអាយុកាន់តែលឿន និងឆាប់ស្លាប់។ ផ្ទុយទៅវិញអ្នកត្រូវធ្វើខ្លួនឲ្យរវល់ ហើយត្រូវរវល់ជាមួយនឹងគោលបំណង ជាមួយនឹងអ្វីដែលអ្នកចង់ធ្វើ។ ជាក់ស្ដែងលោក Hinohara បានរកឃើញគោលបំណងរបស់គាត់ តាំងពីដំបូងបន្ទាប់ពីជីវិតម្តាយរបស់គាត់ត្រូវបានគ្រូពេទ្យជួយសង្គ្រោះ។ អ្នកកាសែត Janit Kawaguchi ដែលចាត់ទុក Hinohara ជាអ្នកផ្ដល់ដំបូន្មានម្នាក់បាននិយាយថា គាត់ជឿជាក់ថាជីវិត គឺមានទាំងការចូលរួមវិភាគទាន ដូច្នេះគាត់មានកំលាំងជំរុញដ៏អស្ចារ្យនេះដើម្បីជួយមនុស្សភ្ញាក់ពីព្រលឹម ហើយធ្វើអ្វីដែលអស្ចារ្យសំរាប់មនុស្សដទៃទៀត នេះជាអ្វីដែលកំពុងជំរុញគាត់និងអ្វីដែលធ្វើឲ្យគាត់ចង់រស់នៅឲ្យបានយូរ។
៤.ច្បាប់វិន័យ បង្កើតភាពតានតឹង ដូច្នេះព្យាយាមកាត់បន្ថយវា៖ ខណៈពេលដែលគាត់បានលើកកម្ពស់ការហាត់ប្រាណ និងអាហារូបត្ថម្ភយ៉ាងច្បាស់ថា ជាមាគ៌ាឆ្ពោះទៅរកជីវិតដែលមានអាយុវែង និងមានសុខភាពល្អជាងមុន។ ប៉ុន្តែដើម្បីទទួលបានទាំងសុខភាពល្អ និងអាយុវែង កុំស្រ្តេសជាមួយរឿងទាំងអស់នោះ គាត់បានណែនាំថា យើងគួរតែរក្សាឥរិយាបថរបស់យើងឲ្យនៅដូចដើម ធ្វើ និងអនុវត្តច្បាប់ទាំងនោះឲ្យដូចជា ទម្លាប់ធម្មតាដែលយើងធ្វើសព្វថ្ងៃ។
៥.ត្រូវចងចាំថា គ្រូពេទ្យមិនអាចព្យាបាលជំងឺបានទាំងអស់ទេ៖ វេជ្ជបណ្ឌិត Hinohara បានព្រមានប្រឆាំងនឹងការទទួលយកដំបូន្មានរបស់វេជ្ជបណ្ឌិតជានិច្ច។ លោកបានទទូចថា វិទ្យាសាស្ត្រតែមួយមុខមិនអាចជួយមនុស្សបានទេ វាតម្រូវឲ្យយើងត្រូវរួបរួមគ្នា ជំងឺគឺជាលក្ខណៈបុគ្គល។ មនុស្សម្នាក់ៗមានលក្ខណៈប្លែកពីគ្នា ហើយជំងឺត្រូវបានផ្សារភ្ជាប់ទៅនឹងដួងចិត្តរបស់ពួកគេ។ ដើម្បីដឹងពីជំងឺ និងជួយមនុស្ស យើងត្រូវការឆន្ទៈ និងគំនិតច្នៃប្រឌិតមិនមែនគ្រាន់តែផ្នែកវេជ្ជសាស្រ្តប៉ុណ្ណោះទេ។ ជាការពិត Hinohara បានធ្វើឱ្យប្រាកដថា មន្ទីរពេទ្យ St. Luke បានបំពេញតម្រូវការចាំបាច់របស់អ្នកជំងឺគឺ៖ « ដើម្បីឱ្យមានភាពសប្បាយរីករាយ » ដោយមន្ទីរពេទ្យបានផ្តល់តន្ត្រី ការព្យាបាលដោយផ្ដល់ជំនួយពីសត្វ និងថ្នាក់សិល្បៈ។ លោកមានប្រសាសន៍ថា៖ « ការឈឺចាប់ គឺអាថ៌កំបាំងហើយការសប្បាយ គឺជាវិធីល្អបំផុតដើម្បីបំភ្លេចវា។ ឧទាហរណ៍ ប្រសិនបើកុមារឈឺធ្មេញ ហើយអ្នកចាប់ផ្តើមលេងហ្គេមជាមួយគ្នា គាត់នឹងភ្លេចពីការឈឺចាប់ភ្លាមៗ »៕
អត្ថបទ៖ លីនី
ប្រភព៖ cnbc