យោងតាមការចុះផ្សាយរបស់សារព័ត៌មាន Channel News Asia កាលពីពេលថ្មីៗនេះ លោក Elon Musk បាននិយាយថា បើសិនជា Twitter អាចបញ្ជាក់បានថា ក្នុងចំណោមគណនី ១០០ គឺជាគណនីពិតទាំងអស់ មិនក្លែងក្លាយ លោកនឹងទិញយកបណ្ដាញសង្គមមួយនេះតាមតម្លៃនៃកិច្ចព្រមព្រៀង ៤៤ពាន់លានដុល្លារអាមេរិកភ្លាមៗ។
មហាសេដ្ឋីមានជាងគេបំផុតលើពិភពលោករូបនេះ បានសរសេរនៅលើ Twitter កាលពីព្រឹកថ្ងៃសៅរ៍ ទី៦ ខែសីហា ថា “ទោះជាយ៉ាងណាក៏ដោយ ប្រសិនបើក្រុមហ៊ុនបង្ហាញថា ឯកសារ SEC របស់ពួកគេមិនពិត នោះការទិញនឹងមិនកើតឡើងទេ”។ ទោះបីជាយ៉ាងនេះក្ដី មកទល់ពេលនេះ ខាង Twitter បានបដិសេធមិនធ្វើអត្ថាធិប្បាយនោះឡើយ។
គួរបញ្ជាក់ផងដែរថា លោក Elon Musk បានប្រកាសដើរចេញពីកិច្ចព្រមព្រៀង ៤៤ពាន់លានដុល្លារអាមេរិកនេះកាលពីពាក់កណ្ដាល ខែ កក្កដា ហើយត្រូវបាន Twitter ប្ដឹងភ្លាមៗផងដែរ ក្រោមបទចោទប្រកាន់ជាច្រើនករណី៕
អត្ថបទ៖ លីនី
ប្រភព៖ channelnewsasia
រូបភាព៖ gulfnews, cnet, dnaindia,