មហាសេដ្ឋី លី កាស៊ីង សព្វថ្ងៃមានអាយុ ៩៤ឆ្នាំ ហើយគាត់នៅតែជាអ្នកមានបំផុតក្នុងទីក្រុងហុងកុង ជាមួយនឹងទ្រព្យសម្បត្តិ ៣៥.៨ ពាន់លានដុល្លារ។ លោក លី គឺជាវិនិយោគិនដ៏អស្ចារ្យ និងជាសប្បុរសជនមួយរូប ហើយធ្លាប់ជាប់ជាបុរសខ្លាំងបំផុតរបស់អាស៊ី ដោយទស្សនាវដ្តីអាស៊ីក្នុងឆ្នាំ២០០១ ដោយបានកាន់កាប់បល្ល័ង្កនៃបុរសមានបំផុតរបស់អាស៊ីអស់រយៈពេលជាច្រើនឆ្នាំ។ នៅទីក្រុងហុងកុង មនុស្សម្នាកោតសរសើរមហាសេដ្ឋីវ័យរូបនេះ រហូតដល់ហៅគាត់ថា “Superman” ដោយសារតែភាពជោគជ័យរបស់គាត់ក្នុងអាជីវកម្ម ក៏ដូចជាទស្សនវិជ្ជាដ៏ជ្រាលជ្រៅនៃជីវិតរបស់គាត់។
មានពេលមួយកំឡុងពេលសំណេះសំណាលជាមួយនិស្សិតនៅសាកលវិទ្យាល័យហុងកុង មហាសេដ្ឋីរូបនេះបានណែនាំយុវជនឱ្យចេះជ្រើសរើសមិត្ត។ ក្នុងនោះ គាត់បាននិយាយថា៖ «កុំចេញទៅក្រៅជាមួយមនុស្សទំនេរ ពួកគេមិនមែនជាមនុស្សអាក្រក់ទេ ប៉ុន្តែមនុស្សទំនេរទាំងនោះមិនទៅធ្វើការឡើយ ព្រោះពួកគេគ្រាន់តែជ្រើសរើសអ្វីដើម្បីស្កប់ចិត្តនឹងជីវិតប៉ុណ្ណោះ។ កាលណាយើងនិយាយជាមួយពួកគេកាន់តែច្រើន យើងកាន់តែរងផលប៉ះពាល់ដោយចិត្តគំនិត “មិនព្យាយាមធ្វើការ” ឬ រីករាយ និងធ្លាប់ពឹងផ្អែកលើអ្នកដទៃ ឬមិនទាន់មានតុល្យភាពលើជីវិតការងារ ទាំងដែលយើងមិនទាន់មានអាជីពសម្រាប់ខ្លួនឯងនៅឡើយ”។
ផ្ទុយទៅវិញមហាសេដ្ឋីរូបនេះ ណែនាំឱ្យយុវជនចេញក្រៅ ឬ ណាត់ជួបជាមួយអ្នកដែលឱ្យតម្លៃលើពេលវេលារបស់គេ ដូចជា អ្នកជំនួញ អ្នកមាន ជាដើម ព្រោះពួកគេមិនដែលខ្ជះខ្ជាយពេលវេលាទេ ពួកគេតែងតែប្រើរាល់វិនាទីដើម្បីធ្វើអ្វីដែលមានប្រយោជន៍។ សម្រាប់ពួកគេ ពេលទំនេរក៏ត្រូវរៀន និងកែលម្អខ្លួនឯង ធ្វើម៉េចឲ្យបានកាន់តែប្រសើរឡើង មិនបណ្ដោយឱ្យជីវិតលេចលង់។
ទន្ទឹមនឹងនេះ មហាសេដ្ឋី Li Ka Shing ក៏ធ្លាប់បាននិយាយដែរថា៖ “ពេលនៅក្មេង កុំខ្លាចភាពក្រីក្រ។ អ្នកត្រូវរៀនពីរបៀបកែលម្អភាពវៃឆ្លាត និងសមត្ថភាពរបស់អ្នក។ ខ្លឹមសារនៃការលត់ដំខ្លួន គឺការរៀនស្គាល់នូវអ្វីដែលចាំបាច់ និងមានតម្លៃក្នុងការវិនិយោគ។ កាត់បន្ថយការញ៉ាំអាហារនៅក្រៅ បើលទ្ធភាពយើងនៅមានកម្រិត។ នៅពេលអ្នកអញ្ជើញនរណាម្នាក់មកទទួលទានអាហារពេលល្ងាច សូមប្រាកដថា គេគឺជាមនុស្សដែលសុបិនធំ ហើយធ្វើការខ្លាំងជាងអ្នក។ មនុស្សដែលចូលចិត្តតែសប្បាយច្រើន នឹងត្រូវលេចលង់ដោយងាយ។ ត្រូវចាំថា នៅពេលដែលអ្នកខ្ជិល តែងតែមានមនុស្សឧស្សាហ៍ព្យាយាម ត្រៀមខ្លួនទទួលយកឱកាស និងជំនួសតំណែងរបស់អ្នក”៕
អត្ថបទ៖ លីនី
ប្រភព៖ hardwarezone
រូបភាព៖ cnbcfm, lksf.org, worldnews52