ជាទូទៅក្មេងដែលមានអាយុចន្លោះពី ៨ ទៅ ១៣ឆ្នាំ តែងតែចំណាយពេលប្រចាំថ្ងៃរបស់ពួកគេជិះកង់ និងលេងហ្គេម បន្ទាប់ពីការរៀនសូត្រ ប៉ុន្តែនេះមិនមែនជាជីវិតកុមារភាពរបស់មហាសេដ្ឋី Ray Dalio, Bill Gates និង Jack Dorsey នោះទេ។ មហាសេដ្ឋីទាំង ៣រូបនេះ មិនបានប្រើជីវិតដូចក្មេងដទៃទេ ពោលគឺក្នុងវ័យនោះ ពួកគាត់បានចាប់ផ្ដើមចូលប្រលូកក្នុងការចាប់ផ្ដើមអាជីវកម្មទៅហើយ។
ស្ដាប់ទៅអាចជារឿងដែលមិនគួរឱ្យជឿ ឬ មិនអាចទៅរួច តែវាជាការពិតហើយខាងក្រោមនេះជារបៀបដែលមហាសេដ្ឋី ៣រូបខាងលើចាប់ផ្ដើមអាជីពរបស់ពួកគេ៖
-មហាសេដ្ឋី Ray Dalio ៖ លោក Ray Dalio ត្រូវបានគេណែនាំឱ្យចូលផ្សារហ៊ុននៅអាយុ ១២ឆ្នាំ។ ក្នុងទសវត្សរ៍ឆ្នាំ១៩៦០ ពេលនោះ Dalio មានវ័យ ១២ឆ្នាំ ហើយបានចូលបម្រើការងារនៅ Wall Street នៅលើទីលានវាយកូនហ្គោលនៅ Long Island ទីក្រុងញូវយ៉ក។ ក្នុងអំឡុងធ្វើការ Dalio បានឮអ្នកដែលមកលេងកូនហ្គោលនិយាយអំពីទីផ្សារភាគហ៊ុន ហើយគាត់ក៏សម្រេចចិត្តយកលុយតុងដែលបានពីភ្ញៀវរបស់គាត់ទៅវិនិយោគទាំងដែលគាត់មិនដឹងថា ការវិនិយោគនោះទទួលបានអ្វីខ្លះឡើយ។ Dalio ដែលឥឡូវមានអាយុ ៧២ឆ្នាំបាននិយាយនៅលើផតឃែស្ថថា គាត់បានជ្រើសរើសការវិនិយោគនៅក្នុងក្រុមហ៊ុនអាកាសចរណ៍ភាគឦសាន ដែលបានបញ្ចូលទៅក្នុងក្រុមហ៊ុនអាកាសចរណ៍ Delta Air Lines ក្នុងឆ្នាំ១៩៧២។ មូលហេតុដែលគាត់រើសយកក្រុមហ៊ុននេះ ដោយសារតែវាជាក្រុមហ៊ុនតែមួយគត់ដែលលោកធ្លាប់លឺថា លក់ភាគហ៊ុនក្នុងតម្លៃតិចជាង ៥ដុល្លារក្នុងមួយហ៊ុន។ ក្រោយមកគាត់បានបង្កើនចំនួនបីដងនៃការវិនិយោគនោះ ហើយបានបង្កើតផលប័ត្រភាគហ៊ុនដែលមានតម្លៃរាប់ពាន់ដុល្លារនៅពេលគាត់បញ្ចប់ការសិក្សានៅវិទ្យាល័យ។ Dalio បានប្រើប្រាស់ជោគជ័យដំបូងនេះទៅក្នុង Bridgewater Associates ដែលជាមូលនិធិការពារហានិភ័យ ដែលគាត់បានបើកដំណើរការក្នុងឆ្នាំ១៩៧៥។ ក្នុងរយៈពេលប្រហែល ៤ទសវត្ស គាត់បានពង្រីកវាទៅជាមូលនិធិការពារហានិភ័យធំបំផុតរបស់ពិភពលោក មុនពេលចុះចេញពីតំណែងជានាយកប្រតិបត្តិនៅឆ្នាំ២០១៧។
-មហាសេដ្ឋី Bill Gates ៖ មុនពេលក្លាយជាមហាសេដ្ឋីលំដាប់ពិភពលោក លោក Bill Gates បានចាប់ផ្ដើមសរសេរកម្មវិធីកុំព្យូទ័រ (សរសេរកូដ) នៅអាយុ ១៣ឆ្នាំ។ នៅពេលរៀនថ្នាក់ទី៨ Gates បានរៀនពីរបៀបសរសេរកម្មវិធី ហើយកាលនោះ គាត់ និងមិត្តរួមថ្នាក់របស់គាត់គឺ Paul Allen ដែលក្រោយមកបានក្លាយជាដៃគូអាជីវកម្មរបស់គាត់ បានបង្កើតប្រព័ន្ធកាលវិភាគថ្នាក់ស្វ័យប្រវត្តិសម្រាប់សាលារបស់ពួកគាត់។ នៅឆ្នាំ១៩៩៣ Gates បានប្រាប់វិទ្យាស្ថាន Smithsonian ថាបទពិសោធន៍នៃការរៀន និងបរាជ័យក្នុងការសរសេរកូដក្នុងវ័យកុមារភាព បានផ្តល់ឱ្យគាត់នូវឱកាសដើម្បីសាកល្បងអ្វីមួយដែលគាត់ “ពូកែ ឬចាប់អារម្មណ៍” តែវាមិនមាននៅក្នុងការបង្រៀននៅសាលាឡើយ។ Gates បាននិយាយថា ការរកឃើញខ្លួនឯងនៅវ័យកាលនោះ គឺអស្ចារ្យណាស់ ពីព្រោះអ្នកបង្កើតអារម្មណ៍នៃទំនុកចិត្តលើខ្លួនឯង និងអត្តសញ្ញាណមួយថា ខ្ញុំដឹងរឿងនេះច្បាស់ណាស់។ ខ្ញុំដឹងរឿងនេះល្អជាងគ្រូ… ប្រហែលជាខ្ញុំពូកែខាងរឿងនេះណាស់។ សរុបមក Gates និង Allen បានបើកដំណើរការក្រុមហ៊ុន Microsoft ក្នុងឆ្នាំ១៩៧៥ ដោយ Gates គឺជានាយកប្រតិបត្តិរបស់ក្រុមហ៊ុនរហូតដល់ឆ្នាំ២០០០ គិតត្រឹមខែមិថុនា ឆ្នាំ២០២២នេះ ក្រុមហ៊ុនមានទីផ្សារភាគហ៊ុនចំនួន ១.៨៥ ទ្រីលានដុល្លារ។
-មហាសេដ្ឋី Jack Dorsey៖ លោក Jack Dorsey បានប្រាប់ផតឃែស្ថ “The Business” របស់សាលាពាណិជ្ជកម្ម Harvard នៅក្នុងឆ្នាំ២០១៤ ថា គាត់បានចាប់ផ្ដើមសរសេរកម្មវិធីតាំងពីក្មេង ហើយក្រោយមកគឺវក់នឹងវាយ៉ាងខ្លាំង។ នៅពេលធំឡើង ឪពុករបស់គាត់ដែលជាវិស្វករម្នាក់បានយក បន្ទះសៀគ្វីពីកន្លែងធ្វើការមកផ្ទះ ធ្វើឱ្យលោកចាប់អារម្មណ៍យ៉ាងខ្លាំងហើយចូលចិត្តការដោះផ្គុំបន្ទះនោះ។ ជាមួយគ្នានេះ នៅឆ្នាំ២០១៣ Dorsey បានប្រាប់កម្មវិធី “60 Minutes” របស់ CBS ថា ចំណាប់អារម្មណ៍នោះបានងាកទៅរកការសរសេរកម្មវិធីវិញ បន្ទាប់ពីឪពុករបស់គាត់ឈប់យកបន្ទះសៀគ្វីមកផ្ទះ តែបែរជាយកកុំព្យូទ័រមកវិញ។ Dorsey បានបន្តថា ចំណាប់អារម្មណ៍របស់គាត់ ក៏ងាកទៅលើកម្មវិធីបញ្ជូនផ្លូវ ដែលកំណត់ផ្លូវទៅកាន់យានជំនិះដូចជា តាក់ស៊ី អ្នកនាំសំបុត្រ និងសេវាសង្គ្រោះបន្ទាន់ផ្នែកវេជ្ជសាស្រ្ដ ដោយគាត់នឹងចំណាយពេលស្តាប់ verbal codes អ្នកឆ្លើយតបបន្ទាន់ដែលប្រើនៅលើវិទ្យុទាក់ទងរបស់ប៉ូលីស។ ការផ្លាស់ប្តូរខ្លីៗដែលបញ្ជូនបន្តទីតាំងយានយន្ត និងសកម្មភាពអ្នកបើកបរនៅទីបំផុតបានបំផុសគំនិតឱ្យគាត់បង្កើត Twitter ។ គាត់បានបង្កើតក្រុមហ៊ុន Twitter ក្នុងឆ្នាំ២០០៦ ហើយដំណើរការក្រុមហ៊ុនរហូតដល់ឆ្នាំ២០០៨ និងពីឆ្នាំ២០១៥ ដល់ឆ្នាំ២០២១៕
អត្ថបទ៖ លីនី
ប្រភព៖ cnbc