មហាសេដ្ឋី Warren Buffett គឺជាអ្នកវិនិយោគដ៏អស្ចារ្យ ដែលនរណាៗក៏ស្គាល់ ជាពិសេសសហគ្រិននៅក្នុងពិភពជំនួញណាក៏កោតខ្លាច សរសើរ និងរៀនសូត្រតាមបិតាវិនិយោគនេះដែរ។ ជារៀងរាល់ឆ្នាំ មហាសេដ្ឋីរូបនេះតែងតែបង្កើតកម្មវិធីដេញថ្លៃមួយ ដើម្បីស្វែងរកអ្នកទទួលទានអាហារថ្ងៃត្រង់មួយពេលជាមួយខ្លួន ដែលតម្លៃនៃការដេញថ្លៃនោះមានចំនួនដល់ទៅខ្ទង់លានដុល្លារ។
យ៉ាងណាមិញក្រោយពេលផ្អាកកម្មវិធីដេញថ្លៃ អស់រយៈពេល ២ឆ្នាំដោយសារជំងឺកូវីដ-១៩ នៅឆ្នាំនេះ កម្មវិធីបានចាប់ផ្ដើមឡើងវិញ ហើយការដេញថ្លៃនៅឆ្នាំនេះក៏ជាលើកចុងក្រោយផងដែរ ដោយឱកាសទទួលទានអាហារជាមួយបិតាវិនិយោគរូបនេះមានតម្លៃដល់ទៅ ១៩លានដុល្លារ នេះបើយោងតាមការចុះបញ្ជីរបស់ Ebay។
ប្រភពដដែលបានឱ្យដឹងថា ការដេញថ្លៃបានបើកកាលពីថ្ងៃអាទិត្យ ជាមួយនឹងតម្លៃចាប់ផ្តើម ២៥,០០០ ដុល្លារ ហើយគិតត្រឹមថ្ងៃច័ន្ទ ការដេញថ្លៃបានឈានដល់ជាង ២លានដុល្លារ។ ជាមួយគ្នានេះ នៅថ្ងៃសុក្រដែលជាថ្ងៃចុងក្រោយ ការដេញថ្លៃបានឈានទៅមុខយ៉ាងស្វិតស្វាញ ដោយមានភោជនីយដ្ឋានដ៏ធំមួយបានដាក់ដេញថ្លៃចំនួន ១១លានដុល្លារ ហើយក្រោយមកការដេញថ្លៃមួយនាទីចុងក្រោយបានលើកតម្លៃចុងក្រោយដល់ ១៩លានដុល្លារ។ ជាលទ្ធផលអ្នកឈ្នះការដេញថ្លៃ និងភ្ញៀវចំនួន ៧នាក់ នឹងអនុញ្ញាតឱ្យទទួលទានអាហារ ជាមួយប្រធាន និងនាយកប្រតិបត្តិក្រុមហ៊ុន Berkshire Hathaway Inc នៅ Smith & Wollensky ក្នុងទីក្រុង New York។
គួរបញ្ជាក់ផងដែរថា ការដេញថ្លៃដើម្បីឈ្នះឱកាសទទួលទានអាហារជាមួយលោក Warren Buffett ត្រូវបានបង្កើតឡើងនៅឆ្នាំ២០០០ ដើម្បីរៃអង្គាសប្រាក់សម្រាប់អង្គការសប្បុរសធម៌ Glide ដែលមានមូលដ្ឋាននៅទីក្រុង San Francisco ដើម្បីជួយដល់ដោះស្រាយភាពក្រីក្រ និងគ្មានផ្ទះសម្បែង នៅសហរដ្ឋអាមេរិកជាពិសេសនៅក្នុងទីក្រុង San Francisco៕
អត្ថបទ៖ លីនី
ប្រភព៖ bangkokpost