យោងតាមការចុះផ្សាយរបស់សារព័ត៌មាន yahoo នៅថ្ងៃទី១៧ ខែមិថុនា នេះ បានឱ្យដឹងថា មហាសេដ្ឋី Elon Musk ត្រូវបានវិនិយោគិន Dogecoin ប្ដឹងទាមទារសំណងចំនួន ២៥៨ពាន់លានដុល្លារ កាលពីថ្ងៃព្រហស្បតិ៍ ដោយចោទប្រកាន់ពីបទដំណើរការគម្រោងពីរ៉ាមីតដើម្បីគាំទ្ររូបិយប័ណ្ណគ្រីបតូ។

នៅក្នុងពាក្យបណ្ដឹងដែលដាក់នៅតុលាការសហព័ន្ធក្នុងទីក្រុង Manhattan ដើមបណ្ដឹង Keith Johnson បានចោទប្រកាន់នាយប្រតិបត្តិក្រុមហ៊ុន Tesla Inc និង SpaceX ពីបទបំផុសបំផុលថា Dogecoin នឹងមានតម្លៃថ្លៃ តែផ្ទុយទៅវិញតម្លៃបានធ្លាក់ចុះ។ ដើមបណ្ដឹងបាននិយាយទៀតថា៖ “លោក Elon Musk បានដឹងតាំងពីឆ្នាំ២០១៩ ថា Dogecoin មិនទាន់មានតម្លៃដើម្បីផ្សព្វផ្សាយ ឱ្យមានការជួញដូរហើយរកប្រាក់ចំណេញបានទេ តែគាត់បានប្រើនាម និងឥទ្ធិពលជាអ្នកមានបំផុតលើលោករបស់ខ្លួន ដើម្បីធ្វើប្រតិបត្តិការ និងរៀបចំគម្រោង Dogecoin​ ជាទម្រង់ ពីរ់ាមីត (Pyramid Scheme) ដើម្បីរកប្រាក់ចំណេញ, ការបង្ហាញ និងជាការកម្សាន្ត”។

ជាមួយគ្នានេះដែរ លោក Keith Johnson បាន​នឹងកំពុងស្វែងរកការខូចខាតចំនួន ៨៦ពាន់លានដុល្លារ ដែលតំណាងឱ្យការធ្លាក់ចុះនៃតម្លៃទីផ្សាររបស់ Dogecoin ចាប់តាំងពីខែឧសភា ឆ្នាំ២០២១ ហើយគាត់ចង់ទទួលសំណងពីការខាតបង់នេះ គុណនឹង ៣ ពីមហាសេដ្ឋី Elon Musk។ លោកក៏បានត្អូញត្អែរថា ការលក់របស់ Dogecoin បានចាប់ផ្តើមនៅចំពេលដែល Musk ធ្វើជាម្ចាស់ផ្ទះកម្មវិធី “Saturday Night Live and, playing a fictitious financial expert on a “Weekend Update” ដែលហៅថា Dogecoin “a hustle” របស់ទូរទស្សន៍ NBC។ មិនតែប៉ុណ្ណោះ លោកក៏ចង់រារាំង Musk និងក្រុមហ៊ុនរបស់គាត់ពីការផ្សព្វផ្សាយ Dogecoin និងចង់ឱ្យចៅក្រម ប្រកាសថា ការជួញដូរ Dogecoin គឺជាការលេងល្បែងនៅក្រោមច្បាប់សហព័ន្ធ និងច្បាប់នៅទីក្រុងញូវយ៉ក។

ទោះជាយ៉ាងណាក្ដី ទាំង Tesla, SpaceX និងមេធាវីរបស់ Musk មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។ ហើយចំពោះមេធាវីរបស់ Johnson វិញក៏មិនបានឆ្លើយតបភ្លាមៗចំពោះសំណើសុំការអត្ថាធិប្បាយលើភស្តុតាងជាក់លាក់ណាមួយ ដែលកូនក្តីរបស់គាត់មាន ឬរំពឹងថានឹងមាន ដើម្បីបញ្ជាក់ថា Dogecoin គ្មានតម្លៃ ហើយចុងចោទបានដំណើរការគម្រោង ពីរ់ាមីត (Pyramid Scheme) ពិតមែន៕

អត្ថបទ៖ លីនី
ប្រភព៖ yahoo