ការនាំចេញគោ និងក្របី របស់ឡាវនៅក្នុងឆ្នាំនេះ អាចលើសពី ២០០លានដុល្លារ បើទោះបីជាការជួញដូរជួបប្រទះនឹងការលំបាក ដោយសារជំងឺរាតត្បាតក៏ដោយ នេះបើយោងតាមការសែត Vientiane Times។ បើតាមទិន្នន័យពីក្រសួងឧស្សាហកម្ម និងពាណិជ្ជកម្មឡាវបង្ហាញថា ប្រទេសនេះរកចំណូលបានជិត ១៨០ លានដុល្លារក្នុងការនាំចេញគោ និងក្របី ក្នុងរយៈពេលប្រាំបួនខែដំបូងនៃឆ្នាំ២០២១។

ការសែត Vientiane Times បានឱ្យដឹងទៀតថា រដ្ឋាភិបាលឡាវកំពុងអំពាវនាវឱ្យកសិករទូទាំងប្រទេសលើកកម្ពស់ផលិតកម្មបសុសត្វសម្រាប់ការនាំចេញ ជាពិសេសទៅកាន់ប្រទេសចិន ក្នុងការប្រមើលមើលប្រតិបត្តិការនាពេលខាងមុខនៃផ្លូវដែកឡាវ-ចិន ដែលត្រូវបានគេរំពឹងថានឹងជួយសម្រួលដល់ការដឹកជញ្ជូន។

ហើយថ្មីៗនេះ ក្រសួងកសិកម្ម និងរុក្ខាប្រមាញ់ឡាវបាននិយាយថា រដ្ឋាភិបាលមានគម្រោងផលិតសត្វគោយ៉ាងហោចណាស់ ៥០,០០០ ក្បាលក្នុងមួយឆ្នាំ។ ក្រោមកិច្ចព្រមព្រៀងអន្តររដ្ឋាភិបាល ឡាវបានទទួលកូតាចំនួន ៥០០,០០០ ក្បាលសម្រាប់នាំចេញទៅប្រទេសចិន។ មន្ត្រីឡាវបានចាត់ទុកថា ការលក់គោក្របីទៅប្រទេសចិន អាចទទួលបានផលចំណេញយ៉ាងច្រើន មិនត្រឹមតែចំពោះអ្នកផលិត និងកសិករប៉ុណ្ណោះទេ ប៉ុន្តែថែមទាំងដល់ប្រទេសជាតិទាំងមូលផងដែរ។

គួរបញ្ជាក់ផងដែរថា កាល​ពី​ឆ្នាំ​មុន តម្លៃ​នាំ​ចេញ​គោ និងក្របីមាន​ដល់​ទៅ ២៥០ លាន​ដុល្លារ ខណៈវៀតណាម​ជា​ប្រទេស​ទិញ​ធំ​ជាង​គេ​ដោយ​ការ​នាំ​ចូល​ដែល​មាន​តម្លៃ ២៤៧ លាន​ដុល្លារ៕

អត្ថបទ៖ លីនី
ប្រភព៖ vietnamplus