វៀតណាមបានចាប់ផ្ដើមដឹកទំនិញដោយផ្ទាល់ទៅអឺរ៉ុប ខណៈរថភ្លើងដឹកទំនិញមួយបានចាកចេញពីទីក្រុងហាណូយ ទៅប៊ែលហ្សិក ជាលើកដំបូងកាលពីថ្ងៃអង្គារកន្លងទៅនេះ។ យោងតាមការចុះផ្សាយរបស់សារព័ត៌មាន vnexpress បានឱ្យដឹងថា រថភ្លើងដែលបានចាប់ផ្ដើមដាក់ដំណើរការនេះ ដឹកទូរកុងតឺន័រសម្លៀកបំពាក់ វាយនភ័ណ្ឌ និងស្បែកជើងស្បែក។
ផ្លូវរថថ្មីនេះនាំជើងរថភ្លើងពីស្ថានីយ៍ Yen Vien នៅក្នុងក្រុងហាណូយ ទៅទីក្រុង Liege របស់ប៊ែលហ្សិក ជាកន្លែងដែលផ្ទុកទូរកុងតឺន័រទំនិញទាំងនោះ ហើយបញ្ជូនដោយរថយន្តដឹកទំនិញទៅកាន់គោលដៅចុងក្រោយគឺទីក្រុង Rotterdam នៃប្រទេសហូឡង់ នេះបើតាមអយស្ម័យានវៀតណាម Vietnam Railways ។
ជាមួយគ្នានេះដែរ រថភ្លើងផ្ទុកទូកុងតឺន័រប្រវែង ៤០ហ្វីត (ប្រមាណជាង ១២ម៉ែត្រ) នីមួយៗ នឹងត្រូវមកដល់ទីក្រុង Zhengzhou ប្រទេសចិន ហើយត្រូវបានតភ្ជាប់ទៅរថភ្លើងអាស៊ី និងអឺរ៉ុប ដែលភ្ជាប់ទៅប៊ែលហ្សិក តាមរយៈប្រទេសរុស្ស៊ី និងបណ្តាប្រទេសអាស៊ីកណ្តាលដោយត្រូវចំណាយពេលចន្លោះពី ២៥-២៧ ថ្ងៃ ក្នុងការធ្វើដំណើរ។
គួរបញ្ជាក់ផងដែរថា ក្រុមហ៊ុនភាគហ៊ុនដឹកជញ្ជូននិងពាណិជ្ជកម្ម (Ratraco) បានភ្ជាប់ទំនាក់ទំនងជាមួយអ្នកបញ្ជូនបន្តនៅក្នុងប្រទេសផ្សេងៗ ដើម្បីផ្តល់សេវាដឹកជញ្ចូនដល់អតិថិជនដោយប្រើរថភ្លើងថ្មីដើម្បីដឹកជញ្ជូនទំនិញ។ ក្រុមហ៊ុន Ratraco និងដៃគូអឺរ៉ុបគ្រោងនឹងដំណើរការរថភ្លើងចំនួន ៨ខ្សែ ក្នុងមួយខែ៕
អត្ថបទ៖ លីនី
ប្រភព៖ vnexpress