រដ្ឋចំនួនដប់ប្រាំបីនៅក្នុងសហរដ្ឋអាមេរិក និងក្រុមហ៊ុនអាជីវកម្មដែលមានស្លាកយីហោធំៗមួយចំនួនកាលពីថ្ងៃសៅរ៍បានប្រកាសអំពីផែនការដើម្បីបញ្ចប់វិធានការពាក់ម៉ាសនៅទីសាធារណៈភ្លាមៗ ឬ ក្នុងរយៈពេលប៉ុន្មានសប្តាហ៍ខាងមុខនេះ ប៉ុន្តែរដ្ឋផ្សេងៗទៀតដូចជារដ្ឋកាលីហ្វ័រញ៉ា ញូវយ៉ក និងញូវជេស៊ី កំពុងដំណើរការវិធានការនេះយ៉ាងតឹងរឹង និងដោយប្រុងប្រយ័ត្ន។
តាមការចុះផ្សាយរបស់សារព័ត៌មាន xinhuanet បានឱ្យដឹងថា ជនជាតិអាមេរិកជាច្រើនមិនបានពាក់ម៉ាស ហើយដើរមិនញញើតតាមនៅទីសាធារណៈកាលពីថ្ងៃសុក្រជាលើកដំបូង នៅក្នុងរយៈពេលប៉ុន្មានខែនេះ ពោលគឺមួយថ្ងៃបន្ទាប់ពីមជ្ឈមណ្ឌលត្រួតពិនិត្យ និងបង្ការជំងឺ (CDC) បានបន្ធូរបន្ថយគោលការណ៍ណែនាំរបស់ខ្លួនស្តីពីការពាក់ម៉ាសសម្រាប់ប្រជាជនដែលបានចាក់វ៉ាក់សាំងការពារជំងឺកូវីដ-១៩ រួចរាល់ទាំងស្រុង។
គួរឱ្យដឹងថា ការអនុវត្តនេះបានកើតឡើងនៅពេលដែលជនជាតិអាមេរិកច្រើនជាងមួយភាគបី ត្រូវបានទទួលការចាក់វ៉ាក់សាំងពេញលេញ ហើយចំនួនករណីឆ្លងប្រចាំថ្ងៃមានការធ្លាក់ចុះមកនៅក្រោម ៣៥ ០០០នាក់ ដែលជាកម្រិតទាបបំផុតចាប់តាំងពីខែកញ្ញាមក៕
អត្ថបទ៖ លីនី
ប្រភព៖ xinhuanet