ក្រសួងទេសចរណ៍និងកីឡា កំពុងពិចារណាផ្តល់ជើងហោះហើរឆ្លងកាត់តាមខេត្តដោយឥតគិតថ្លៃសម្រាប់ភ្ញៀវទេសចរបរទេស បន្ទាប់ពីបុគ្គលិកក្រុមហ៊ុនអាកាសចរណ៍ត្រូវបានអនុម័តសម្រាប់ការចាក់វ៉ាក់សាំងការពារវីរុស Covid-19 នៅសប្តាហ៍នេះ។ លោក Phiphat Ratchakitprakarn រដ្ឋមន្រ្តីក្រសួងទេសចរណ៍ និងកីឡា បានមានប្រសាសន៍ថា៖ « ចាប់ពីថ្ងៃទី១ ខែកក្កដា ភ្ញៀវទេសចរដែលទទួលបានការលើកលែងពីការដាក់នៅដាច់ដោយឡែកពីគ្នា អាចត្រូវបានពន្យារពេលស្នាក់នៅទីនេះបន្ទាប់ពីចំណាយពេល ១០ ថ្ងៃនៅភូកេតប្រសិនបើយើងអាចផ្តល់ជូនពួកគេនូវសំបុត្រយន្តហោះដោយឥតគិតថ្លៃ ឬ បញ្ចុះតម្លៃ ទៅកាន់ខេត្តផ្សេងទៀត »។

លោកបានបន្ថែមថា ក្រសួងបានពិភាក្សាផែនការនេះរួចហើយជាមួយក្រុមហ៊ុន Bangkok Airways ដែលជាម្ចាស់និងប្រតិបត្តិករអាកាសយានដ្ឋាន Samui ព្រោះកោះនេះមានសក្តានុពលអាចផ្ទុកអ្នកដំណើរបាន។ កិច្ចខិតខំប្រឹងប្រែងនេះ មានគោលបំណងទាក់ទាញភ្ញៀវទេសចរបរទេស ១០០,០០០ នាក់ក្នុងរយៈពេល ៣ ខែដំបូង នៃការផ្តួចផ្តើមគំនិត “tourism sandbox” របស់ភូកេត។

ថ្លែងនៅក្នុងកិច្ចប្រជុំសមាគមសណ្ឋាគារថៃកាលពីថ្ងៃព្រហស្បតិ៍លោក Phiphat ក៏បានស្នើសុំឱ្យម្ចាស់សណ្ឋាគារចូលរួមក្នុងគម្រោងនេះដោយផ្តល់កញ្ចប់ពិសេសដល់ភ្ញៀវទេសចរដែលចង់ចំណាយពេលយូរជាង ១០ ថ្ងៃនៅប្រទេសថៃ។

ទន្ទឹមនឹងនេះអាជ្ញាធរអាកាសចរណ៍ស៊ីវិលនៃប្រទេសថៃបានប្រកាសកាលពីថ្ងៃអង្គារថា ផែនការអនុញ្ញាតឱ្យភ្ញៀវទេសចរណ៍ដែលហោះហើរឆ្លងកាត់តាមបណ្តាខេត្តនានា គឺកំពុងមានកម្មវិធីចាក់វ៉ាក់សាំងសម្រាប់បុគ្គលិកក្រុមហ៊ុនអាកាសចរណ៍។ លោក Woranate Laprabang នាយកប្រតិបត្តិក្រុមហ៊ុន Thai Vietjet (TVJ) បាននិយាយថា ការចែកចាយថ្នាំបង្ការ Covid-19 សម្រាប់ក្រុមហ៊ុនអាកាសចរណ៍នឹងពង្រឹងទំនុកចិត្តទេសចរណ៍ក្នុងចំណោមអ្នកដំណើរបរទេស និងថៃ។

បន្ថែមលើវ៉ាក់សាំង TVJ កំពុងចូលរួមគំរោងការធ្វើដំណើររបស់សមាគមដឹកជញ្ជូនតាមផ្លូវអាកាសអន្ដរជាតិ ដែលជាប្រព័ន្ធវិញ្ញាបនប័ត្រធ្វើដំណើរ។ ក្រុមហ៊ុនរំពឹងថា នឹងសាកល្បងប្រើជើងហោះហើរពាក់កណ្តាលពាណិជ្ជកម្មពីទីក្រុងហូជីមិញទៅទីក្រុងបាងកកនៅខែមិថុនា។

ដោយឡែកលោក Santisuk Klongchaiya នាយកប្រតិបត្តិក្រុមហ៊ុន Thai AirAsia បាននិយាយថា ក្រុមហ៊ុនអាកាសចរណ៍បានត្រៀមខ្លួនរួចជាស្រេចក្នុងការផ្តល់ជូននូវការបញ្ចុះតម្លៃលើផ្លូវឆ្លងកាត់ខេត្តសម្រាប់ភ្ញៀវក្នុងកម្មវិធី “tourism sandbox” ប្រសិនបើពួកគេមានទំនុកចិត្តគ្រប់គ្រាន់ក្នុងការទៅទស្សនាខេត្តដែលមិនមានអភ័យឯកសិទ្ធិ។

គួរបញ្ជាក់ផងដែរថា ប្រទេសថៃបានកំណត់គោលដៅប្រកបដោយមហិច្ឆតាដើម្បីនាំភ្ញៀវទេសចរចំនួន ៦.៤ លាននាក់បន្ថែមទៀតនៅក្នុងត្រីមាសចុងក្រោយនៃឆ្នាំនេះ នៅពេលដែលតំបន់ចំនួន ៥ ទៀតគឺតំបន់ Krabi, Samui, Pattaya, Phangnga និង Chiang Mai ចូលរួមក្នុង “tourism sandbox” ប៉ុន្តែលោក Phiphat បាននិយាយថា ផែនការនេះនឹងមិនអាចទៅរួចទេ បើទីក្រុងបាងកកមិនត្រូវបានរាប់បញ្ចូលក្នុងកម្មវិធីនោះ៕

អត្ថបទ៖ លីនី
ប្រភព៖ bangkokpost