យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា គ្រឹះស្ថានអង្គរបានប្រកាសឱ្យដឹងថារយៈពេល៥ខែនៃឆ្នាំ២០២៥ ការលក់បណ្ណចូលទស្សនាក្នុងតំបន់អង្គររកចំណូលបានជាង ២៤លានដុល្លារអាមេរិក ជាមួយចំនួនភ្ញៀវទេសចរបរទេស៥២៧ ៥៧៧នាក់ ។ក្នុងនេះគិតជារួមទេសចរអាមេរិកបានឈរនៅលេខរៀងទី១ ខណៈក្នុងខែឧសភាវិញ ទេសចរចិនបានឈរនៅលំដាប់ទី១។
តាមសេចក្តីប្រកាសព័ត៌មានរបស់គ្រឹះស្ថានអង្គរបានបញ្ជាក់ថារយៈពេល៥ខែនេះភ្ញៀវទេសចរអន្តរជាតិចូលទស្សនាអង្គរចំនួន ៥២ ៧៦៧នាក់ កើនឡើង ១១,៧១ភាគរយ ធៀបនឹងឆ្នាំ២០២៤ និងរកចំណូលបានចំនួន ២៤ ៥៦៩ ០២៤ដុល្លារអាមេរិក កើនឡើង ១០,៦៤ភាគរយ ធៀបនឹងរយៈពេលដូចគ្នា កាលពីឆ្នាំ២០២៤។
ដោយឡែកសម្រាប់ក្នុងខែឧសភាមានភ្ញៀវទេសចរអន្តរជាតិទិញបណ្ណចូលទស្សនាអង្គរ មានចំនួន ៥២ ៧៦៧នាក់ បើធៀបនឹងខែឧសភា ឆ្នាំ២០២៤ កើនឡើងជាង ៣ភាគរយ និងរកចំណូលបានចំនួន ២ ៣៦០ ២១៤ដុល្លារ កើនឡើងជាង ៣ភាគរយ បើធៀបក្នុងរយៈពេលដូចគ្នាកាលពីឆ្នាំ២០២៤។ក្នុងខែឧសភានេះដែរ ភ្ញៀវទេសចរបរទេសដែលទិញសំបុត្រចូលទស្សនារមណីយដ្ឋានអង្គរ គឺភ្ញៀវទេសចរចិន ជាប់លំដាប់លេខ១, សហរដ្ឋអាមេរិកលេខ២, អង់គ្លេសលេខ៣, អូស្ត្រាលីលេខ៤, បារាំងលេខ៥ និងជប៉ុនលេខ៦។ ប៉ុន្តែរយៈពេល៥ខែ ពីខែមករាដល់ខែឧសភានេះ ភ្ញៀវទេសចរអន្តរជាតិដែលទិញសំបុត្រច្រើនជាងគេ គឺសហរដ្ឋអាមេរិកលេខ១, អង់គ្លេសលេខ២, ប្រទេសបារាំងលេខ៣, ចិនលេខ៤ និងលេខ៥ ប្រទេសកូរ៉េខាងត្បូង។
ដោយឡែកក្រៅពីការលក់សំបុត្រតំបន់ទស្សនារមណីយដ្ឋានអង្គរ គ្រឹះស្ថានអង្គរក៏ទទួលបានចំណូលពីប្រភពចំនួន ៤ ផ្សេងទៀតរួមមាន តំបន់ប្រាសាទកោះកេរ មានទឹកប្រាក់ ១៧២ ៤៨៥ ដុល្លារ, ប្រាសាទបេងមាលា ៧៥ ៥២០ដុល្លារ, តំបន់ភ្នំក្បាលស្ពាន ២ ៨៥០ដុល្លារ និងតំបន់កំពង់ផែចុងឃ្នៀស ១ ១៤៣ ៤២១ដុល្លារ។
ក្រសួងទេសចរណ៍បានព្យាករណ៍ថា ឆ្នាំ២០២៥កម្ពុជានឹងទទួលបានភ្ញៀវទេសចរបរទេសប្រមាណ ៧,៥ លាននាក់ ដែលនឹងនាំចំណូលចូលសេដ្ឋកិច្ចជាតិប្រមាណជាង ៥ ពាន់លានដុល្លារ។ ជាមួយគ្នានេះរាជរដ្ឋាភិបាលបានបង្កើតក្រុមប្រឹក្សាទីផ្សារ និងផ្សព្វផ្សាយទេសចរណ៍កម្ពុជា ដែលមានតំណាងមកពីវិស័យសាធារណៈ និងឯកជន ដើម្បីផ្សព្វផ្សាយទេសចរណ៍កម្ពុជាទៅកាន់ទីផ្សារអន្តរជាតិបន្ថែមទៀត៕
ប្រភព៖ ក្រសួងព័ត៌មាន