ថៃ៖ នាយកដ្ឋានពាណិជ្ជកម្មផ្ទៃក្នុងនៃក្រសួងពាណិជ្ជកម្ម កំពុងត្រៀមផ្តល់ជំនួយដល់កសិករចិញ្ចឹមបង្គាបន្ទាប់ពីមានការបិទទ្វាររយៈពេល ១៤ ថ្ងៃនៅខេត្ត សាមុតសាខន ដែលជាមូលដ្ឋានផលិតកម្មអាហារសមុទ្រដ៏សំខាន់សម្រាប់ផលិតផលអាហារសមុទ្រដើម្បីទប់ស្កាត់ការរីករាលដាលនៃវីរុស Covid-19។ លោក Wattanasak Sur-iam អគ្គនាយកនៃនាយកដ្ឋានបានមានប្រសាសន៍ថា ផ្អែកតាមការចរចាជាមួយភាគីពាក់ព័ន្ធរួមទាំងមន្រ្តីសុខាភិបាល និងអ្នកដែលនៅក្នុងខ្សែចង្វាក់ផ្គត់ផ្គង់បង្គា មានបរិមាណបង្គាចំនួន ១០០ តោនជារៀងរាល់ថ្ងៃដែលត្រូវគ្រប់គ្រង ដូច្នេះហើយបន្ទាប់ពីមានការបិទទ្វារនៅក្នុងខេត្ត កសិករចិញ្ចឹមបង្គាមានការព្រួយបារម្ភអំពីកន្លែងដែលត្រូវលក់ផលិតផលរបស់ពួកគេ។

លោក Wattanasak បានបន្តថា នាយកដ្ឋានពាណិជ្ជកម្មផ្ទៃក្នុង នឹងស្វែងរកទីផ្សារថ្មីសម្រាប់កសិករចិញ្ចឹមបង្គា ដើម្បីលក់ផលិតផលរបស់ពួកគេ ហើយបានស្វែងរកការសហការពីអ្នកដៃគូផ្សេងៗរួមមាន សមាគមភោជនីយដ្ឋានថៃ និងតាមហាងលក់រាយនៅតាមផ្សារទំនើប។ ទោះយ៉ាងបីជាយ៉ាងនេះក្ដី លោកក៏នឹងស្នើសុំឱ្យកសិករចិញ្ចឹមបង្គាពន្យារពេលការប្រមូលផលផងដែរ ខណៈ លោក Poj Aramwattananont ប្រធានសមាគមអាហារក្លាសេថៃ និងជាអនុប្រធានសភាពាណិជ្ជកម្មថៃបាននិយាយថា ការផ្ទុះឡើងទាក់ទងនឹងទីផ្សារបង្គាអាចបណ្តាលឱ្យមានការធ្លាក់ចុះតម្រូវការ។

លោកបានជំរុញឱ្យគ្រប់ភាគីពាក់ព័ន្ធទាំងអស់ចូលរួមលើកកម្ពស់ការយល់ដឹងអំពីការរីករាលដាលនៃវីរុសនេះ ដើម្បីធានាថាវាមិនបំផ្លាញទំនុកចិត្តអ្នកប្រើប្រាស់ឡើយ។ យោងទៅតាមលោក Poj ការស្វែងរកទីផ្សារសម្រាប់កសិករចិញ្ចឹមបង្គាក៏អាចជួយធ្វើឱ្យតម្លៃមានស្ថេរភាពផងដែរ។ យ៉ាងណាមិញ លោក Kanchit Hemarak ប្រធានកសិករចិញ្ចឹមបង្គាថៃបានមានប្រសាសន៍ថា ផលប៉ះពាល់ពីការផ្ទុះឡើងនាពេលបច្ចុប្បន្ននេះ គឺនៅមានកម្រិតនៅឡើយ ហើយសមាគមកំពុងវាយតម្លៃពីការខូចខាតខាងហិរញ្ញវត្ថុ៕

អត្ថបទ៖ លីនី
ប្រភព៖ bangkokpost