រដ្ឋាភិបាលឥណ្ឌូនេស៊ីមានផែនការឃ្លាំមើលការនាំចេញត្រីរបស់ខ្លួនទៅកាន់ប្រទេសចិនឲ្យកាន់តែតឹងរ៉ឹងជាងមុន បន្ទាប់ពីមានការរឹតបន្តឹងការនាំចូលជាបន្តបន្ទាប់ទាក់ទងនឹងការព្រួយបារម្ភអំពីការឆ្លងរោគរាតត្បាតតាមរយៈពេលទំនិញ។ យោងតាមក្រសួងកិច្ចការសមុទ្រ និងជលផលឥណ្ឌូណេស៊ី គិតត្រឹមខែវិច្ឆិកាអ្នកនាំចេញត្រីឥណ្ឌូនេស៊ីចំនួន ៣ មកពី North Sumatra, East Java និង Banten បានប្រឈមនឹងការផ្អាកការនាំចូលពីអាជ្ញាធរគយចិន បន្ទាប់ពីគេបានរកឃើញថាមានមេរោគឆ្លងថ្មីនៅក្នុងគំរូផលិតផលរបស់ពួកគេ។

អ្នកនាំពាក្យក្រសួងពាណិជ្ជកម្មលោក Fithra Faisal បាននិយាយថា រដ្ឋាភិបាលនឹងបង្កើនកិច្ចខិតខំប្រឹងប្រែងរបស់ខ្លួន ក្នុងពិនិត្យរក​វីរុស Covid-19 ក្នុងការនាំត្រីចេញទៅកាន់ប្រទេសចិន ហើយនឹងពង្រីកវិធានការបែបនេះសម្រាប់ការនាំចេញទៅប្រទេសផ្សេងទៀតផងដែរ។

គួររម្លឹកថា ប្រទេសចិនបានចាប់ផ្តើមធ្វើតេស្តសាច់ឆៅ និងក្លាសេដែលបាននាំចូល និងអាហារសមុទ្រក្លាសេក្នុងខែមិថុនា កិច្ចខិតខំប្រឹងប្រែងនេះត្រូវបានពង្រឹងបន្ថែមទៀតនៅក្នុងខែវិច្ឆិកា បន្ទាប់ពីកម្មករកំពង់ផែនៅទីក្រុងនានារបស់ប្រទេសចិនបានធ្វើតេស្តរកឃើញវីរុស Covid-19។ ទន្ទឹមនឹងនេះនៅក្នុងខែវិច្ឆិកាដដែលប្រទេសចិនបាននិយាយថា ខ្លួនបានរកឃើញវីរុសនេះទៅលើការវេចខ្ចប់ផលិតផលពី ២០ ប្រទេសរួមទាំងសាច់ជ្រូកអាល្លឺម៉ង់ និងត្រីឥណ្ឌា ហើយកាលពីថ្ងៃទី១០ ខែវិច្ឆិកាប្រទេសចិនបានផ្អាកការនាំចូលពីក្រុមហ៊ុននាំចេញត្រីឥណ្ឌូនេស៊ី PT Anugrah Laut ឥណ្ឌូនេស៊ីអស់រយៈពេលមួយសប្តាហ៍ បន្ទាប់ពីដានវីរុស Covid-19 ត្រូវបានគេរកឃើញថាមាននៅក្នុងផលិតផលត្រីក្លាសេដែលផ្គត់ផ្គង់ដោយក្រុមហ៊ុនរបស់ឥណ្ឌូនេស៊ី៕

អត្ថបទ៖ លីនី
ប្រភព៖ vietnamplus