ប្រជាជនកម្ពុជាជិត ៥ ម៉ឺននាក់កំពុងត្រូវបានជួលឱ្យធ្វើការជាពលករចំណាកស្រុកនៅសាធារណរដ្ឋកូរ៉េទោះបីមានការរីករាលដាលនៃជំងឺ Covid-19 ក៏ដោយ។ ការធ្វើបច្ចុប្បន្នភាព ត្រូវបានគូសបញ្ជាក់កាលពីម្សិលមិញនៅក្នុងកិច្ចប្រជុំរវាងរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ឯកឧត្ដម អ៊ិត សំហេង និងឯកឧត្ដម Park Heung Kyeon ឯកអគ្គរដ្ឋទូតកូរ៉េប្រចាំនៅកម្ពុជា នៅការិយាល័យក្រសួងនៅទីក្រុងភ្នំពេញ។

យោងតាមឯកឧត្ដម Park Heung Kyeon បានឱ្យដឹងថាប្រទេស និងប្រជាជនរបស់គាត់ពេញចិត្តចំពោះចរិតល្អរបស់ពលករកម្ពុជារហូតមកដល់ពេលនេះ។ ឯកឧត្ដម អ៊ិត សំហេង បានថ្លែងអំណរគុណដល់ឯកអគ្គរដ្ឋទូតក៏ដូចជាសាធារណរដ្ឋកូរ៉េ និងប្រជាជនកូរ៉េដែលបានផ្តល់ឱកាសដល់ពលករកម្ពុជា។

ឯកឧត្ដម ក៏បានលើកទឹកចិត្តប្រទេសកូរ៉េខាងត្បូងឱ្យទទួលយកពលករចំណាកស្រុកពីកម្ពុជាបន្ថែមទៀត ជាពិសេសនៅពេលដែលជំងឺរាតត្បាតកំពុងធូរស្រាល។ គួរឱ្យដឹងផងដែរថា ចាប់តាំងពីឆ្នាំ ២០០៧ ប្រទេសកម្ពុជាបានបញ្ជូនពលករសរុបចំនួន ៦៨,២៩៤ នាក់ (ស្រី ១៤,២៥៥ នាក់) ទៅធ្វើការនៅប្រទេសកូរ៉េជាពិសេសក្នុងវិស័យឧស្សាហកម្ម កសិកម្ម និងសំណង់ក្រោមកិច្ចសន្យារយៈពេល ៤ ឆ្នាំ ១០ ខែ៕

ប្រភព៖ ក្រសួងព័ត៌មាន