ធនាគារអភិវឌ្ឍន៍អាស៊ី (ADB) បានអនុម័តហិរញ្ញប្បទានជាង ២៩ លានដុល្លារដើម្បីគំាទ្ររាជរដ្ឋាភិបាលកម្ពុជាធ្វើឱ្យប្រសើរឡើងនូវការផ្តល់សេវាតាមរយៈកំណែទម្រង់ សំខាន់ៗក្នុងការគ្រប់គ្រងហិរញ្ញវត្ថុសាធារណៈ និងវិមជ្ឈការជាពិសេសនៅតាមតំបន់ជនបទដែលភាគច្រើនពលរដ្ឋក្រីក្ររស់នៅ នេះបើយោងតាមសេចក្ដីប្រកាសព័ត៌មានរបស់ ADB ។
ក្នុងសេចក្ដីប្រកាសព័ត៌មានបានលើកឡើងថា សម្រាប់កម្មវិធីទី២ នៃការអភិវឌ្ឍផ្នែកសេវា និងការគ្រប់គ្រងវិស័យហិរញ្ញវត្ថុសាធារណៈដែលបានធ្វើវិមជ្ឈការរួមមានប្រាក់កម្ចីផ្តោតលើគោលនយោបាយចំនួន ២០ លានដុល្លារដែលនឹងគាំទ្រដល់វិធីសាស្រ្តដើម្បីពង្រឹងផែនការ និងការគ្រប់គ្រងសារពើពន្ធនៃរដ្ឋបាលមូលដ្ឋានក៏ដូចជារដ្ឋបាលសាធារណៈ។ ទន្ទឹមនេះ ប្រាក់កម្ចីអនុវត្តន៍គម្រោងចំនួន ៩.៣៥ លានដុល្លារដើម្បីជួយកសាងសាលារដ្ឋបាលមូលដ្ឋានជាតិ ដែលជាមជ្ឈមណ្ឌលបណ្តុះបណ្តាលសម្រាប់មន្រ្តីរាជរដ្ឋាភិបាលក្នុងតំបន់។ លើសពីនេះទៀត រាជរដ្ឋាភិបាលកម្ពុជានឹងផ្តល់ហិរញ្ញប្បទានដល់គម្រោងនេះចំនួន ១.៧ លានដុល្លារផងដែរ។
លោកស្រី Jhelum Thomas អ្នកជំនាញជាន់ខ្ពស់ផ្នែកគ្រប់គ្រងវិស័យសាធារណៈរបស់ ADB បានគូសបញ្ជាក់ថា គម្រោងនេះមានគោលបំណងជួយដល់រដ្ឋបាលមូលដ្ឋាននៅទូទាំងប្រទេសកម្ពុជាក្នុងការផ្តល់នូវសេវាសាធារណៈមូលដ្ឋានប្រកបដោយនិរន្តរភាព និងប្រសិទ្ធភាពហើយក៏នឹងបង្រួមគម្លាតតំបន់ជនបទ និងទីប្រជុំជនផងដែរ។ លោកស្រីបានបន្ថែមថា « គម្រោងនេះចាំបាច់ណាស់ខណៈដែលជំងឺរាតត្បាតកូវីដ-១៩ ធ្វើឱ្យប្រជាពលរដ្ឋមួយចំនួនបានផ្លាស់ទីពីទីក្រុងទៅជនបទ។ ប្រការនេះ នឹងនាំ ដល់សម្ពាធបន្ថែមដល់រដ្ឋបាលមូលដ្ឋានក្នុងការផ្តល់ជំនួយសង្គម និងសេវាកម្មចំបាច់ដូចជាផ្លូវថ្នល់ការផ្គត់ផ្គង់ទឹក និងអនាម័យដើម្បីគាំទ្រដល់ការរីកចម្រើនប្រកបដោយបរិយាប័ន្ន និងសមធម៌ »។
យោងតាមរបាយការណ៍របស់ ADB បានឱ្យដឹងថា ផលិតផលក្នុងស្រុកសរុប (GDP) របស់កម្ពុជាបានកើនឡើង ៨% ជារៀងរាល់ឆ្នាំចាប់ពីឆ្នាំ ១៩៩៩ ដល់ឆ្នាំ ២០១៩ កាត់បន្ថយភាពក្រីក្រមកនៅត្រឹម ១៣.៥% ក្នុងឆ្នាំ ២០១៤ ពី ៤៧.៨% ក្នុងឆ្នាំ ២០០៧។ ប៉ុន្តែពលរដ្ឋកម្ពុជាជាង ៧០% រស់នៅជាមួយចំណូលតិចជាង ៣ ដុល្លារ ក្នុងមួយថ្ងៃហើយការទទួលបានសេវាមូលដ្ឋានក៏មិនទាន់ស្មើគ្នា។ ចំពោះគ្រួសារក្រីក្រ និងងាយរងគ្រោះប្រឈមហានិភ័យធ្ងន់ធ្ងរខណៈពេលដែលមានជំងឺរាតត្បាតកូវីដ-១៩ ដែលបាននាំឱ្យមានការធ្លាក់ចុះគួរឱ្យកត់សម្គាល់នៃវិស័យសំខាន់ៗក្នុងសេដ្ឋកិច្ចកម្ពុជា និងការលំបាកនៃជីវភាពរស់នៅ។
លោកស្រី Jhelum Thomas បានអះអាងថា កម្មវិធីរបស់ ADB នេះនឹងបំពេញបន្ថែមលើកម្មវិធីទី១ នៃការអភិវឌ្ឍផ្នែកសេវា និងការគ្រប់គ្រងវិស័យហិរញ្ញវត្ថុសាធារណៈបានធ្វើវិមជ្ឈការដែលកំពុងតែមានដំណើរការ។ លោកស្រីបានបន្ដថា កម្មវិធីនេះនឹងជួយពង្រឹងការសម្របសម្រួលការងារទីភ្នាក់ងារពាក់ព័ន្ធដើម្បីទទួលបានការផ្តល់សេវាកម្មដែលឆ្លើយតបនឹងតម្រូវការ ប្រកបដោយការទទួលខុសត្រូវដែលរួមបញ្ចូលនូវការពង្រឹងផែនការថវិកាសវនកម្ម និងមុខងារអ្នកស៊ើបអង្កេតជាយុទ្ធសាស្រ្ត។ ជាមួយគ្នានេះ វាក៏នឹងធ្វើឱ្យប្រសើរឡើងនូវការគ្រប់គ្រងចំណូល និងចំណាយដើម្បីឆ្លើយតបនឹងតម្រូវការក្នុងមូលដ្ឋាន និងដោះស្រាយកង្វះខាតនៃជំនាញសម្រាប់រយៈពេលវែងរបស់មន្រ្តីរដ្ឋបាលមូលដ្ឋាន។ លោកស្រីបានបន្ថែមទៀតថា គម្រោងនេះនឹងគាំទ្រដល់ការសាងសង់ និងដំណើរការនៃសាលា រដ្ឋបាលមូលដ្ឋានជាតិថ្មីដែលនឹងផ្តល់នូវការអភិវឌ្ឍជំនាញតាមរចនាសម្ព័ន្ធសម្រាប់មន្រ្តីរដ្ឋបាលមូលដ្ឋាន។
បើតាម ADB បានបញ្ជាក់ឱ្យដឹងថា រាជរដ្ឋាភិបាលបានធ្វើកំណែទម្រង់វិមជ្ឈការក្នុងឆ្នាំ ២០០១។ រដ្ឋបាលថ្នាក់ក្រោមជាតិ បន្តប្រឈមមុខនឹងបញ្ហានៃភាពខ្សោយក្នុងការធ្វើផែនការថ្នាក់ក្រោមជាតិការគ្រប់គ្រងចំណូល និងចំណាយមិនសូវមានប្រសិទ្ធភាព និងការអភិវឌ្ឍជំនាញមន្រ្តីសាធារណៈ។ ADB បានផ្តល់ការគាំទ្រយ៉ាងទូលំទូលាយដល់កំណែទម្រង់វិមជ្ឈការរបស់កម្ពុជាចាប់តាំងពីឆ្នាំ ២០០២ ដូចជាការគាំទ្រដល់កំណែទម្រង់ច្បាប់គោលនយោបាយ និងស្ថាប័ន។ នៅក្នុងចន្លោះឆ្នាំ ២០០២ និងឆ្នាំ ២០១២ ការចូលរួមរបស់ ADB ផ្តោតលើការពង្រឹងក្រុមប្រឹក្សាឃុំ សង្កាត់ និងការពង្រីកសេវាកម្មនៅតាមតំបន់ជនបទ។
ចាប់តាំងពីឆ្នាំ ២០១២ មកការគាំទ្ររបស់ ADB បានផ្តោតលើការពង្រឹងការសម្របសម្រួលការងាររបស់រាជរដ្ឋាភិបាល ក្របខ័ណ្ឌច្បាប់ ស្ថាប័ន និងការកំណត់តួនាទី និងភារកិច្ចក្នុងការផ្តល់សេវា។ តែទោះបីជាយ៉ាងនេះក្ដី គម្រោងថ្មីនេះគឺស្របទៅនឹងអាទិភាពដែលបានដាក់ក្នុងយុទ្ធសាស្ត្រភាពជាដៃគូរបស់ ADB សម្រាប់ប្រទេសកម្ពុជា ២០១៩-២០២៣៕
ប្រភព៖ ក្រសួងព័ត៌មាន