កសិករខេត្តកំពង់ធំ ប្រើប្រាស់ដ្រូនកសិកម្មសម្រាប់ដំណាំស្រូវរបស់ខ្លួន ដោយចំណាយដើមទុនតិច ចំណេញពេលវេលា មិនប៉ះពាល់សុខភាព និងជួយឱ្យការដាំដុះមានប្រសិទ្ធភាពខ្ពស់ជាងមុន។

លោក ខឿន ខួច កសិករខេត្តកំពង់ធំ បានឱ្យដឹងថា ក្រោយពីមានការណែនាំពីមន្ទីរកសិកម្ម ពីភាពចំណេញនៃការប្រើប្រាស់ដ្រូនលើដំណាំស្រូវ លោកបានចាប់ផ្តើមជួលដ្រូននេះពីមន្ត្រីជំនាញរបស់មន្ទីរ ដើម្បីយកមកប្រើប្រាស់លើផ្ទៃដីជាង ៥០ ហិកតា។ លោកបន្តថា ការប្រើប្រាស់ដ្រូនកសិកម្មនេះ បានសម្រាលការនឿយហត់បានច្រើន ជាពិសេសបានកាត់បន្ថយថវិកា ចំណេញពេលវេលា ចំណេញជី និងថ្នាំព្រមទាំងមិនធ្វើឱ្យប៉ះពាល់ដល់សុខភាពទៀតផង។

លោកបញ្ជាក់ថា សម្រាប់ការបាញ់ថ្នាំលើដំណាំស្រូវ ១០ ហិកតាដោយការបង្ហោះដ្រូនចំណាយពេលតែ ៣ ម៉ោងប៉ុណ្ណោះ ខណៈដែលក្នុងរយៈពេលដូចគ្នាការប្រើដោយកម្លាំងមនុស្ស គឺអាចបាញ់ថ្នាំបានតែពី ៣ ទៅ ៤ ហិកតាប៉ុណ្ណោះ។ សម្រាប់ការព្រោះគ្រាប់ស្រូវតាមរយៈដ្រូន ក៏បានចំណេញច្រើនដូចគ្នា ។ លោក ខឿន ខួច និយាយថា « ខ្ញុំប្រើដ្រូននេះជាង ១ ឆ្នាំហើយ ដោយកាលពីមុខក្នុងមួយថ្ងៃខ្ញុំជួលបុគ្គលិកម្នាក់ត្រូវចំណាយពី ៥ ម៉ឺនទៅ ៦ ម៉ឺនរៀលតាមជិតតាមឆ្ងាយ ហើយបើយើងប្រើដ្រូនដឹងថាអស់ ៤ ម៉ឺនរៀលប្រាកដជាធ្វើបានសម្រេចតែម្ដងតាមអ្វីដែលយើងចង់បាន »។

លោកបន្តថា ទោះបីជាយើងជួបបញ្ហាអីក៏យើងអត់ភ័យបារម្ភឡើយ ព្រោះដ្រូននេះបម្រើការងារយើងបានទាន់ពេលវេលា។ ហើយខ្ញុំចាប់ផ្តើមប្រើប្រាស់ដ្រូននេះ ដោយទី១ ខ្ញុំចំណេញពេលវេលា ទី២ ចំណេញថវិកាដោយអត់ប្រើប្រាស់ទៅលើកម្មករដែលចំណាយខ្ជះខ្ជាយ ទី៣ យើងចំណេញថ្នាំ ទី៤ ចំណេញទឹកដោយយើងមិនសូវហត់នឿយលើកម្មករច្រើន ទី៥ មិនប៉ះពាល់ដល់សុខភាពរបស់យើង ហើយស្រូវរបស់យើងពេលប្រើទៅគឺវាខុសពីការបាញ់ដោយមនុស្ស ដោយសារតែការប្រើមនុស្សពេលខ្លះមិនបានសព្វទីកន្លែង ប៉ុន្តែបើយើងប្រើលើដ្រូននេះ គឺវាសព្វល្អ ហើយវាមានតម្លៃសមរម្យជាងយើងប្រើកម្លាំងមនុស្ស។

សូមបញ្ជាក់ផងដែរថា ដ្រូនមិនត្រឹមតែជាឧបករណ៍ពេញនិយមសម្រាប់ការបង្ហោះថតវីដេអូប៉ុណ្ណោះទេ ប៉ុន្តែដ្រូនត្រូវបានគេយកទៅប្រើប្រាស់នៅក្នុងវិស័យកសិកម្មផងដែរដូចជា៖ ប្រើលើដំណាំស្រូវ ឪឡឹក ម្រេច ពោត និងដំណាំជាច្រើនទៀត ដែលជួយឱ្យកសិករចំណាយតិច ចំណេញច្រើន៕

ប្រភព៖ ក្រសួងព័ត៌មាន