ថៃ៖ រដ្ឋាភិបាលបានបញ្ជាឱ្យគ្រប់ទីភ្នាក់ងាររបស់រដ្ឋ និងការិយាល័យពាក់ព័ន្ធដើម្បីរៀបចំផែនការស្តារសេដ្ឋកិច្ចរបស់ខ្លួនឡើងវិញ ដើម្បីជម្រុញសេដ្ឋកិច្ចក្នុងស្រុកដែលជាមធ្យោបាយសំខាន់ដើម្បីជួសជុលសេដ្ឋកិច្ចដែលហិនហោចពីកម្រិតទាបបំផុតឡើងទៅ។ រដ្ឋរំពឹងថានឹងដាក់ចេញផែនការស្តារឡើងវិញនៅខែមិថុនា ឬនៅពេលណាដែលការចាក់សោរត្រូវបានដកហូតដែលនឹងត្រូវដាក់ជូនដើម្បីទទួលបានការយល់ព្រមពីគណៈរដ្ឋមន្រ្តី។

លោកឧបនាយករដ្ឋមន្រ្តី Somkid Jatusripitak បានមានប្រសាសន៍ថា រដ្ឋាភិបាលបានដាក់ចេញនូវកញ្ចប់ជំនួយសង្គ្រោះពីការរាតត្បាតនៃវីរុសកូវីដ-១៩ ដែលមានចំនួន ៤០០ ពាន់លានបាត (១២.៣៧ ពាន់លានដុល្លារ) ដើម្បីជួយប្រជាជន និងអាជីវកម្មក្នុងតំបន់ដែលរដ្ឋាភិបាលកំពុងហៅថា “ ការស្តារសេដ្ឋកិច្ចមូលដ្ឋាន” ។ លោកបានបន្តថា ប្រទេសថៃនឹងឈរលើជួរមុខដោយចាប់ផ្តើមផែនការស្តារសេដ្ឋកិច្ចដើម្បីជួយសហគ្រាសធុនតូចនិងមធ្យមនិងសហគ្រាសសហគមន៍។ ខណៈរដ្ឋាភិបាលជឿជាក់ថាសេដ្ឋកិច្ចជនបទអាចជាក្បាលម៉ាស៊ីនថ្មីមួយដើម្បីជំរុញអំណាចទិញនៅក្នុងប្រទេស។

បន្ថែមពីនេះលោក Somkid មានប្រសាសន៍ថា រដ្ឋាភិបាលកំពុងផ្ដោតលើវិស័យកសិកម្ម ដោយវិស័យនេះគួរតែកែលម្អ និងអភិវឌ្ឍផលិតផលដែលមានតម្លៃបន្ថែមខ្ពស់។ ខណៈពេលដែលវិស័យទេសចរណ៍ និងការនាំចេញនៅខ្សោយហើយបានបន្តធ្លាក់ចុះ ចំនែកការស្ទុះងើបឡើងវិញនឹងចំណាយពេលយូរព្រោះវិស័យទាំងពីរត្រូវការការគាំទ្រទាំងក្នុងស្រុកក៏ដូចជាតម្រូវការពីទីផ្សារបរទេសផងដែរ ដូច្នេះសេដ្ឋកិច្ចថៃមិនអាចពឹងផ្អែកលើវិស័យទេសចរណ៍និងការនាំចេញក្នុងកំឡុងពេលមានជំងឺរាតត្បាតកូវីដ-១៩ បានទេ។

យ៉ាងណាមិញរដ្ឋាភិបាលកំពុងអំពាវនាវឱ្យធនាគារកសិកម្ម និងសហករណ៍កសិកម្ម ធនាគារអភិវឌ្ឍន៍សហគ្រាសធុនតូចនិងមធ្យមថៃ និងធនាគារសន្សំរដ្ឋាភិបាលជួយគាំទ្រដល់កសិករនិងសហគ្រិនជនបទ។ ជាមួយគ្នានេះលោក Somkid បានឲ្យដឹងថា ទីភ្នាក់ងាររបស់រដ្ឋត្រូវតែជួយកសិករ និងប្រជាជននៅតាមខេត្តទទួលបានហិរញ្ញប្បទាន និងបណ្តាញទីផ្សារ ហើយប្រតិបត្តិករអាជីវកម្មគួរតែសហការជាមួយគម្រោងរបស់រដ្ឋាភិបាល។ ដោយឡែករដ្ឋមន្រ្តីក្រសួងឧស្សាហកម្មលោក Suriya Jungrungreangkit បាននិយាយថា ក្រសួងរបស់លោកនឹងស្នើផែនការស្តារសេដ្ឋកិច្ចចំនួន ១០ ពាន់លានបាត (ប្រមាណ ៣០៩ លានដុល្លារ) ដើម្បីផ្តល់ជំនួយដល់កសិករក្នុងស្រុក សហគ្រាសធុនតូចនិងមធ្យម។

តាមប្រភពដដែលបានបន្តថា ផែនការ ១០ ពាន់លានបាតនេះក៏ត្រូវបានប្រើដើម្បីដោះស្រាយផលប៉ះពាល់នៃគ្រោះរាំងស្ងួតដែលកំពុងកើតឡើងនៅលើកំពូលនៃវិបត្តិសេដ្ឋកិច្ចដែលបណ្តាលមកពីជំងឺរាតត្បាតកូវីដ-១៩។ ហើយផែនការនេះមានគោលបំណងបង្កើនប្រសិទ្ធភាពនៃការគ្រប់គ្រងទីផ្សារ និងអាជីវកម្មក្រោមនាយកដ្ឋានជំរុញឧស្សាហកម្ម និងផ្អាកការសងបំណុល ផ្តល់ការលើកលែងថ្លៃសេវា និងសាងសង់អាងស្តុកទឹកសម្រាប់កសិដ្ឋាន។ មិនតែប៉ុណ្ណោះតាមរយៈគំនិតផ្តួចផ្តើមនេះក្រសួងឧស្សាហកម្មនឹងផ្តល់ជំនួយដល់កសិករដាំអំពៅចំនួន ៣៤០ លានបាតគ្របដណ្ដប់លើកសិករចំនួន ៥,០០០ នាក់ដែលកាន់កាប់ដីចំការ ២០,០០០រ៉ៃ និងបង្កើតការងារថ្មីនៅក្នុងគម្រោងអាងស្តុកទឹកចាស់ដែលមានទំហំ ២ ម៉ឺនរ៉ៃសម្រាប់កម្មករ ៥០០ នាក់៕

ប្រភព៖ bangkokpost
អត្ថបទ៖ លីនី