វៀតណាម៖ រដ្ឋាភិបាលបានដាក់សំណើទៅរដ្ឋសភា ដើម្បីពន្យារគោលនយោបាយលើកលែងពន្ធដីកសិកម្មដល់ដំណាច់ឆ្នាំ ២០២៥ ដើម្បីគាំទ្រដល់កសិករ និងជំរុញការអភិវឌ្ឍកសិកម្ម។ យោងតាមក្រសួងហិរញ្ញវត្ថុបាននិយាយថា ការប៉ាន់ស្មានពន្ធដីកសិកម្មប្រមាណ ៧.៥ ទ្រីលានដុង (៣.២ ពាន់លានដុល្លារ) នឹងត្រូវបានលើកលែងរាល់ឆ្នាំក្នុងចាប់ពីឆ្នាំ ២០២១-២០២៥ ដែលត្រូវបានគេរំពឹងថានឹងកែប្រែវិស័យកសិកម្មមកជាការវិនិយោគដើម្បី ពង្រីកផលិតកម្ម កែលម្អផលិតភាព និងគុណភាពផលិតផល។

ជាមួយគ្នានេះដែរក្រសួងបានបន្តថា ការលើកលែងពន្ធដីកសិកម្មនឹងមិនបណ្តាលឱ្យមានការធ្លាក់ចុះចំណូលថវិការដ្ឋទេពីព្រោះគោលនយោបាយនេះត្រូវបានអនុវត្តរួចហើយចាប់ពីឆ្នាំ ២០០១។ យោងតាមសេចក្តីសម្រេចរបស់រដ្ឋសភា 55/2010/QH12 ចុះថ្ងៃទី២៤ ខែវិច្ឆិកាឆ្នាំ ២០១០ ការលើកលែងនេះត្រូវបានកំណត់រហូតដល់នៅចុងឆ្នាំនេះ។ ក្នុងរយៈពេលពីរទសវត្សកន្លងមកនេះ គោលនយោបាយបានបង្ហាញថា ជួយលើកកម្ពស់ជីវភាពកសិករ និងបង្កើតការងារសម្រាប់វិស័យជនបទដែលតាមរយៈនោះកសិករអាចមានដើមទុនក្នុងការវិនិយោគ និងអនុវត្តវិទ្យាសាស្ត្រ និងបច្ចេកវិទ្យាក្នុងផលិតកម្មកសិកម្ម។

លើសពីនេះគោលនយោបាយនេះក៏បានលើកទឹកចិត្តដល់កសិករកុំទុកដីទំនេរចោល និងជួយឱ្យពួកគេមានអារម្មណ៍សុវត្ថិភាពនៅពេលមានការវិនិយោគលើវិស័យកសិកម្ម។ យោងតាមស្ថិតិរបស់ក្រសួងបានបង្ហាញថាកសិករជាង ១០ លាននាក់និងដីកសិកម្ម ៦ លានហិកតាបានទទួលការលើកលែងពន្ធជារៀងរាល់ឆ្នាំក្នុងឆ្នាំ ២០០៣-២០១០ ជាមួយនឹងផលបូកដែលមានតម្លៃជាមធ្យម ៣.២ ទ្រីលានដុងនៅក្នុងពន្ធដីកសិកម្មដែលត្រូវបានលើកលែងរៀងរាល់ឆ្នាំ។

គួរបញ្ជាក់ផងដែរថា ក្នុងឆ្នាំ ២០១១-២០១៦ ការលើកលែងនេះបានផ្តល់ផលប្រយោជន៍ដល់កសិករ ១២ លាននាក់និងដីជាង ៧ លានហិកតា។ ពន្ធដែលត្រូវបានលើកលែងមានចំនួន ៦.៣ ទ្រីលានដុងក្នុងមួយឆ្នាំ។ ដោយឡែកក្នុងឆ្នាំ ២០១៧-២០១៨ ប្រជាកសិករជាង ១២ លាននាក់ និងដីកសិកម្មជាង ៨ លានហិកតាបានទទួលការលើកលែងដោយមានពន្ធជាមធ្យម ៧.៤ ទ្រីលានដុងក្នុងមួយឆ្នាំ។ ក្រសួងហិរញ្ញវត្ថុបាននិយាយថាតម្លៃក្នុងឆ្នាំ ២០១៣-២០១៨ មានចំនួនសរុប ១៧ ទ្រីលានដុង រួមជាមួយទឹកប្រាក់បន្ថែមបានបង្កើតនូវធនធានហិរញ្ញវត្ថុផ្ទាល់ដ៏សំខាន់មួយសម្រាប់វិស័យកសិកម្ម៕

ប្រភព៖ vietnamplus
អត្ថបទ៖ លីនី