បើយោងតាមការចុះផ្សាយរបស់ Nikkei Asian Review បានឱ្យដឹងថា ក្រុមហ៊ុន Apple នឹងចាប់ផ្តើមផលិតកាសស្តាប់ត្រចៀកឥតខ្សែ AirPods របស់ខ្លួនក្នុងពេលឆាប់ៗនេះនៅឯប្រទេសវៀតណាម ព្រោះដើម្បីកាត់បន្ថយការផលិតក្នុងប្រទេសចិន។ ក្នុងនោះផងដែរក្រុមហ៊ុនចិន GoerTek ដែលជាក្រុមហ៊ុនផលិតសំខាន់មួយឱ្យក្រុមហ៊ុន Apple ក៏នឹងចាប់ផ្តើមធ្វើតេស្តសាកល្បងលើដំណើរការផលិតឧបករណ៍ AirPods ជំនាន់ថ្មី នៅឯរោងចក្រក្នុងភាគខាងជើងប្រទេសវៀតណាម។ នេះគឺជាលើកដំបូងហើយដែល AirPods ត្រូវបានផលិតនៅក្រៅប្រទេសចិន ចាប់តាំងពីការបង្ហាញខ្លួនដំបូងកាលពីឆ្នាំ 2016 ។

ក្រុមហ៊ុន Apple បានសរសេរទៅកាន់អ្នកផ្គត់ផ្គង់គ្រឿងបន្លាស់របស់ខ្លួន ដោយស្នើពួកគេឱ្យគាំទ្រកិច្ចខិតខំប្រឹងប្រែងរបស់ Goertek ទោះបីវាស្ថិតក្នុងដំណាក់កាលសាកល្បងដំបូង និងតិចតួចក៏ដោយ។ ក្រុមហ៊ុន GoerTek កាលពីខែតុលាឆ្នាំមុន ក៏បានស្នើសុំអ្នកផ្គត់ផ្គង់ទាំងអស់ដែលជាប់ពាក់ព័ន្ធក្នុងការផលិត AirPod របស់ខ្លួន ដើម្បីបញ្ជូនសម្ភារៈចាំបាច់ទាំងអស់ទៅប្រទេសវៀតណាម។ ហើយក្រុមហ៊ុនតៃវ៉ាន់ Foxconn ដែលជាក្រុមហ៊ុនផ្គត់ផ្គង់គ្រឿងអេឡិចត្រូនិកដ៏ធំ ក៏បានជួលកន្លែងទំនេរមួយនៅឯសួនឧស្សាហកម្មភាគខាងជើងវៀតណាមផងដែរ៕

អត្ថបទ៖ លីដា