យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា ក្រុមហ៊ុនផលិតរថយន្តអគ្គិសនីរបស់ចិនម៉ាក “BYD” បានសម្រេចបណ្ដាក់ទុនវិនិយោគក្នុងការបង្កើតរោងចក្រផ្គុំ និងដំឡើងរថយន្តនៅកម្ពុជា ដោយបានជ្រើសរើសទីតាំងនៅខេត្តព្រះសីហនុ ក្នុងចំនួនទឹកប្រាក់ដំបូង៣២លានដុល្លារអាមេរិក។
ប្រភពរបាយការណ៍ក្រុមប្រឹក្សាអភិវឌ្ឍន៍កម្ពុជាកាលពីពេលថ្មីៗនេះបានបញ្ជាក់ថា រោងចក្រផ្គុំដំឡើងរថយន្តមួយ ត្រូវបានបោះទុនវិនិយោគនៅក្នុងតំបន់សេដ្ឋកិច្ចពិសេសក្រុងព្រះសីហនុ ។គម្រោងនេះនឹងផ្ដល់ការងារដល់ប្រជាពលរដ្ឋជាង២០០កន្លែង ។
គួររំលឹកថា តាមរយៈគម្រោងរោងចក្រផ្គុំដំឡើងរថយន្តនេះ នឹងធ្វើឱ្យកម្ពុជាមានរោងចក្រដំឡើងរថយន្តក្នុងស្រុកបន្ថែមមួយទៀត បន្ទាប់ពីរោងចក្រផ្គុំដំឡើងរថយន្តតូយ៉ូតារបស់ជប៉ុនបានបើកសម្ពោធដំណើរការ កាលពីថ្ងៃទី២ ខែឧសភា ឆ្នាំ២០២៤ កន្លងទៅនេះ។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា មានប្រសាសន៍ថា ពេលនេះក្រុមហ៊ុនផលិតរថយន្តរបស់ចិន BYD កំពុងសាងសង់រោងចក្រផ្គុំដំឡើងរថយន្តអគ្គិសនីរបស់ខ្លួននៅក្នុងតំបន់សេដ្ឋកិច្ចពិសេសក្រុងព្រះសីហនុ ហើយរោងចក្រនេះនឹងអាចរួចរាល់នៅចុងឆ្នាំ២០២៥នេះ ។
ភាគច្រើននៃរថយន្តអគ្គិសនី គឺគេដំឡើងនៅប្រទេសណា គេលក់នៅប្រទេសនោះ ។សម្រាប់រោងចក្រដំឡើងរថយន្តអគ្គិសនីរបស់ចិន BYD ជាជំហានដំបូង គឺដំឡើងរថយន្តផ្គត់ផ្គង់នៅកម្ពុជា ដោយជំហានបន្ទាប់ ក្រុមហ៊ុននេះអាចនឹងផលិតគ្រឿងបង្គុំរថយន្តសម្រាប់នាំចេញទៅកាន់ទីផ្សារប្រទេសផ្សេងដើម្បីដំឡើងនៅប្រទេសនោះ។នេះជាការបញ្ជាក់បន្ថែមរបស់ឯកឧត្តមឧបនាយករដ្ឋមន្រ្តី ស៊ុន ចាន់ថុល ។
ឯកឧត្តមបន្តថា មុនពេលក្រុមហ៊ុនសម្រេចចិត្តបណ្ដាក់ទុនវិនិយោគនៅខេត្តព្រះសីហនុ ក្រុមប្រឹក្សាអភិវឌ្ឍន៍កម្ពុជាបាននាំថ្នាក់ដឹកនាំក្រុមហ៊ុនទស្សនកិច្ច និងពិនិត្យមើលទីតាំងសក្ដានុពលសម្រាប់វិនិយោគជាច្រើនកន្លែង តែចុងក្រោយ ក្រុមហ៊ុននេះបានសម្រេចយកតំបន់សេដ្ឋកិច្ចពិសេសក្រុងព្រះសីហនុខេត្តព្រះសីហនុ ជាទីតាំងវិនិយោគរបស់ខ្លួន ព្រោះទីតាំងនេះ ងាយស្រួលក្នុងការដឹកជញ្ជូនគ្រឿងបង្គុំពីខាងក្រៅមកដំឡើងក្នុងរោងចក្រ រួចហើយដឹកចេញទៅចែកចាយតាមបណ្ដាខេត្តនានារួមទាំងភ្នំពេញ។
សូមជម្រាបថា ឆ្នាំ២០២៤កន្លងទៅ ចំនួនយានយន្តអគ្គិសនីចុះបញ្ជីនៅក្រសួងសាធារណការនិងដឹកជញ្ជូនមានចំនួន៧៥៧គ្រឿង បើប្រៀបធៀបនឹងឆ្នាំ ២០២៣ មានកំណើន៣១២ភាគរយ ។
រាជរដ្ឋាភិបាលបានកំណត់យកខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង ដោយគ្រោងទាក់ទាញគម្រោងវិនិយោគជាទឹកប្រាក់ប្រមាណ២០ពាន់លានដុល្លារអាមេរិកក្នុងរយៈពេល១៥ឆ្នាំ ទាំងគម្រោងអចលនទ្រព្យ ឧស្សាហកម្ម និងទេសចរណ៍ជាដើម ។នៅដើមឆ្នាំ ២០២៥នេះរដ្ឋាភិបាលក៏បានបន្តអនុវត្តកម្មវិធីពិសេសជំរុញការវិនិយោគនៅក្នុងខេត្តព្រះសីហនុរហូតដល់ដាច់ឆ្នាំ ២០២៥ ៕
ប្រភព៖ ក្រសួងព័ត៌មាន