យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា ក្នុងសប្ដាហ៍នេះវិទ្យាស្ថានពហុបច្ចេកទេសខេត្តបន្ទាយមានជ័យបានជូនដំណឹងស្តីពីការប្រកាសជ្រើសរើសសិក្ខាកាមឱ្យចូលរួមជំនាញ សម្រាប់សញ្ញាបត្របច្ចេកទេស និងវិជ្ជាជីវៈ១ ដោយឥតគិតថ្លៃសរុបចំនួន ១២៦០នាក់។នេះជាឱកាសសម្រាប់ យុវជន យុវនារី កម្មករ កម្មការិនី និងជនចំណាកស្រុកដែលមកពីគ្រួសារក្រីក្រ គ្រួសារងាយរងហានិភ័យ គ្រួសារដែលមានបណ្ណសម្គាល់ជនមានពិការភាព មានបណ្ណមូលនិធិសមធម៌សុខាភិបាល និងយុវជនដែលបានឧទ្ទេសនាមដោយរដ្ឋបាលខេត្ត ស្រុក ឃុំសង្កាត់។
ប្រភពដដែលបញ្ជាក់ថា ជំនាញដែលផ្តល់ជូនរួមមាន ៖ ការដំឡើងបណ្តាញអគ្គិសនីក្នុងអគារ , ការថែទាំ និងជួសជុលរថយន្ត, សេវាកម្មកុំព្យូទ័រ , ការងារកំបោរ , ការដំឡើងបណ្តាញបំពង់ទឹក, ការថែទាំ និងជួសជុលអគ្គិសនីរថយន្ត, ការថែទាំ និងជួសជុលម៉ាស៊ីនត្រជាក់រថយន្ត, ការរចនាក្រាហ្វិកដោយកុំព្យូទ័រ, សេវាកម្មរដ្ឋបាល, សេវាកម្មបរិក្ខាត្រជាក់ក្នុងគេហដ្ឋាន, ធុរកិច្ចភេសជ្ជៈ, ការកែច្នៃបន្លែ និងផ្លែឈើ, ជួសជុលទោចក្រយានយន្ត និង ការងារការិយាល័យជួរមុខ។
លក្ខខណ្ឌនៃការជ្រើសរើស ៖ យុវជនមានអាយុចាប់ពី១៥ឆ្នាំឡើង, យុវជនមានបណ្ណសមធម៌ (កម្រិតភាពក្រីក្រ១ ឬ២) ឬបណ្ណគ្រួសារងាយរងហានិភ័យ, យុវជនមកពីគ្រួសារដែលសមាជិកមានបណ្ណសម្គាល់ជនមានពិការភាព, យុវជនមកពីគ្រួសារដែលសមាជិកមានបណ្ណមូលនិធិសមធម៌សុខាភិបាល, យុវជនដែលឧទ្ទេសនាមដោយ រដ្ឋបាលខេត្ត ស្រុក/ក្រុង ឃុំ/សង្កាត់។
វិទ្យាស្ថានបានបញ្ជាក់ថា ការសិក្សាដោយឥតបង់ថ្លៃ, ទទួលបានប្រាក់ឧបត្ថម្ភប្រចាំខែចំនួន ២៨ម៉ឺនរៀលក្នុង១ខែ ដោយសិក្សាពេញម៉ោង សម្រាប់យុវជនមានបណ្ណសមធម៌ ឬបណ្ណគ្រួសារងាយរងហានិភ័យ, មានផ្តល់ការប្រឹក្សាយោបល់ពីការជ្រើសរើសជំនាញ និងព័ត៌មានទីផ្សារការងារ, ផ្តល់កន្លែងចុះកម្មសិក្សានៅតាមសហគ្រាស គ្រឹះស្ថាន ឧស្សាហកម្ម និងក្រុមហ៊ុនឯកជន, ទទួលបានសញ្ញាបត្របច្ចេកទេស និងវិជ្ជាជីវៈ១ និងឱកាសបន្តការសិក្សា, ទទួលបានជំនាញមួយពិតប្រាកដដែលទីផ្សារការងារកំពុងត្រូវការ, ទទួលបានឱកាសការងារធ្វើសមរម្យ និងចំណូលទៀងទាត់។
ឯកសារភ្ជាប់ក្នុងការដាក់ពាក្យចូលរៀន មាន សៀវភៅគ្រួសារ, សំបុត្រកំណើត, អត្តសញ្ញាណបណ្ណសញ្ជាតិខ្មែរ, រូបថតថ្មីផ្ទៃពណ៌ខៀវ (៤x៦) ៤សន្លឹក និង (៣x4) ២សន្លឹក, បណ្ណសមធម៌ ឬបណ្ណសម្គាល់គ្រួសារងាយរងហានិភ័យ ឬបណ្ណសម្គាល់ជនមានពិការភាព ឬបណ្ណមូលនិធិសមធម៌សុខាភិបាល ឬលិខិតឧទ្ទេសនាមដោយរដ្ឋបាលខេត្ត ស្រុក/ក្រុង ឃុំ/សង្កាត់។
កាលបរិច្ឆេទចុះឈ្មោះចូលរៀន ៖ ចាប់ពីថ្ងៃជូនដំណឹងនេះ រហូតដល់ថ្ងៃទី២៨ ខែសីហា ឆ្នាំ២០២៤ ។ កាលបរិច្ឆេទចូលរៀន ៖ ថ្ងៃទី០២ ខែកញ្ញា ឆ្នាំ២០២៤។
សម្រាប់ព័ត៌មានបន្ថែម និងការដាក់ពាក្យ សូមទៅកាន់អាសយដ្ឋានបណ្តោះអាសន្នរបស់វិទ្យាស្ថាន ស្ថិតនៅភូមិកងវ៉ា សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ឬទំនាក់ទំនងតាមទូរស័ព្ទលេខ 095 934 447៕
ប្រភព៖ ក្រសួងព័ត៌មាន