លោកជំទាវ ចម និម្មល រដ្ឋមន្រ្តី​ក្រសួង​ពាណិជ្ជកម្មបានជំរុញឱ្យក្រុមហ៊ុន Hyundai Agro (Cambodia) Co., Ltd. ដែលជាក្រុមហ៊ុននាំចូល និងចែកចាយកសិផលខ្មែរនៅប្រទេសកូរ៉េខាងត្បូង ឱ្យនាំចូល និងចែកចាយកសិផលខ្មែរឱ្យច្រើនថែមទៀត និងបន្ថែមមុខទំនិញដូចជា មៀនប៉ៃលិន និងចេក ជាដើម។

ការជំរុញដល់ក្រុមហ៊ុនខាងលើនេះ គឺត្រូវបានធ្វើឡើងនៅក្នុងឱកាសដែល លោកជំទាវ ចម និម្មល បានអញ្ជើញ​ដឹកនាំគណៈប្រតិភូ​កម្ពុជា ធ្វើទស្សនកិច្ចនៅឃ្លាំងស្តុកកសិផល​មួយកន្លែងនៅទីក្រុងសេអ៊ូល ដើម្បីស្វែងយល់អំពី​ខ្សែច្រវ៉ាក់ផ្គត់ផ្គង់ ការដឹកជញ្ជូន ការរក្សាទុក និងការចែក​ចាយ​កសិផលនាំចូលពីកម្ពុជាមកទីផ្សារកូរ៉េ ដែលក្នុងនោះដែរ ក៏មានផ្លែស្វាយរបស់កម្ពុជាម៉ាករំដួល ដែលត្រូវបាន​នាំចូល​និងចែកចាយដោយក្រុមហ៊ុន Hyundai Agro (Cambodia) Co., Ltd.។

ឆ្លៀតក្នុងឱកាសនោះផងដែរ លោកជំទាវរដ្ឋមន្រ្តីបានជម្រាបជូនក្រុមហ៊ុនអំពីសក្តានុពលផលិតកម្មកសិកម្ម ក្នុងនោះរួមទាំង ផ្លែឈើស្រស់របស់កម្ពុជា និងបានជំរុញឱ្យក្រុមហ៊ុនជួយជំរុញ នាំចូលនិងចែកចាយឱ្យកាន់តែ​ច្រើន​ថែមទៀតនូវកសិផលកម្ពុជាបន្ថែមពីផ្លែស្វាយ គឺដូចជា មៀនប៉ៃលិន ចេក ជាដើម៕

អត្ថបទ៖ លីនី
ប្រភព៖ ក្រសួងពាណិជ្ជកម្ម