លោកស្រី Kristalina Georgieva ប្រធានមូលនិធិរូបិយវត្ថុអន្តរជាតិ (IMF) បានអំពាវនាវឱ្យបន្តការប្រុងប្រយ័ត្ន ខណៈហានិភ័យចំពោះស្ថិរភាពហិរញ្ញវត្ថុបានកើនឡើង។ នេះបើយោងតាមការចុះផ្សាយរបស់សារព័ត៌មាន Channel News Asia កាលពីថ្ងៃទី២៦ ខែមីនា ឆ្នាំ២០២៣នេះ។

លោកស្រី បានលើកឡើងបែបនេះ កាលពីថ្ងៃអាទិត្យ ដោយក្នុងនោះក៏បានរម្លឹកឡើងវិញផងដែរ នូវទស្សនៈរបស់លោកស្រីថា ឆ្នាំ២០២៣ នឹងក្លាយជាឆ្នាំដ៏លំបាកមួយទៀត ដោយកំណើនពិភពលោកបានធ្លាក់ចុះមកនៅក្រោម 3% ដោយសារផលប៉ះពាល់បន្សល់ពីជំងឺរាតត្បាត សង្គ្រាមនៅអ៊ុយក្រែន និងការរឹតបន្តឹងរូបិយវត្ថុ។

ជាមួយគ្នានេះដែរ នៅឯវេទិកាអភិវឌ្ឍន៍ចិន លោកស្រី Georgieva បានលើកឡើងថា ទោះបីជាមានទស្សនវិស័យកាន់តែប្រសើរឡើងសម្រាប់ឆ្នាំ២០២៤ ក៏ដោយ ក៏កំណើនពិភពលោកនឹងនៅតែទាបជាងមធ្យមភាគចាស់របស់ខ្លួនដែលមាន ៣.៨ ភាគរយ ហើយទស្សនវិស័យទាំងមូលនៅតែខ្សោយ។

គួរបញ្ជាក់ផងដែរថា មូលនិធិរូបិយវត្ថុអន្តរជាតិ (IMF) ដែល​បាន​ព្យាករ​ពី​កំណើន​សេដ្ឋកិច្ច​ពិភពលោក​ថាមានចំនួន ២.៩ ភាគរយ​នៅ​ឆ្នាំ​នេះ គ្រោង​នឹង​ចេញ​ផ្សាយ​ការ​ព្យាករណ៍​ថ្មី​នៅ​ខែ​ក្រោយ៕

អត្ថបទ៖ លីនី
ប្រភព៖ channelnewsasia