នាយកដ្ឋានស៊ើបអង្កេតពិសេសថៃ (DSI) បានរឹបអូសទំនិញក្លែងក្លាយចំនួន ៣៦០,០០០ នៅក្នុងខេត្ត Nakhon Nayok និងស្រុក Bang Bon នៃទីក្រុងបាងកក។ លោក Pol Lt Col Phayao Thongsen អគ្គនាយករង (DSI) បាននិយាយកាលពីម្សិលមិញថា ប្រតិបត្តិការបង្រ្កាបបានធ្វើឡើងនៅទីតាំងចំនួន ១២នៅក្នុងផ្សារក្នុងខេត្ត Nakhon Nayok និងឃ្លាំងមួយនៅស្រុក Bang Bon។

ក្នុងនោះ (DSI) បានរឹបអូសទំនិញក្លែងក្លាយចំនួន​ ៣០០,០០០ គ្រឿងដែលសុទ្ធសឹងតែជាម៉ាកយីហោថ្លៃៗនិងល្បីៗដូចជា Louis Vuitton, Chanel និង Coach ពីផ្សាររ៉ុងក្លឿ និង the coin markets នៅខេត្ត Nakhon Nayok។ ជាមួយគ្នានេះ នៅទីក្រុងបាងកក (DSI) ក៏បានរកឃើញ និងរឹបអូសខោខូវប៊យម៉ាកយីហោក្លែងក្លាយជាង ៦០,០០០ នៅក្នុងឃ្លាំងមួយក្នុងតំបន់ Bang Bon។

គួរបញ្ជាក់ផងដែរថា នាយកដ្ឋានស៊ើបអង្កេតពិសេសថៃ (DSI) បាននិងកំពុងធ្វើការជាមួយ Satyapon & Partners Ltd ដែលជាក្រុមហ៊ុនច្បាប់បញ្ញវន្តពេញលេញ ដើម្បីស្វែងរកទីតាំងសំខាន់ៗដែលលក់របស់ក្លែងក្លាយ។ អ្នកតំណាង Satyapon & Partners Ltd បានប្រាប់ប្រព័ន្ធផ្សព្វផ្សាយថា នេះគឺជាការរឹបអូសដ៏ធំបំផុតរបស់ (DSI) លើទំនិញក្លែងក្លាយ ខណៈប៉ូលីសបាននិយាយថា ទំនិញក្លែងក្លាយទាំងនេះ គឺនាំចូលពីប្រទេសជិតខាង ហើយទំនិញទាំងនោះក៏នាំចូលដោយខុសច្បាប់ និងគេចវេសពីការបង់ថ្លៃនាំចូល ២៥% ផងដែរ។ ទន្ទឹមនឹងនេះ លោក Pol Lt Col Phayao បាន​និយាយ​ថា ទាំងនេះ​បាន​ជះ​ឥទ្ធិពល​អវិជ្ជមាន​មិន​ត្រឹម​តែ​លើ​សេដ្ឋកិច្ច​ប៉ុណ្ណោះ​ទេ ប៉ុន្តែ​ថែម​ទាំង​មុខមាត់​ប្រទេស​ផង​ដែរ៕

អត្ថបទ៖ លីនី
ប្រភព៖ bangkokpost