យោងតាមការចុះផ្សាយរបស់សារព័ត៌មាន Yahoo បានឱ្យដឹងថា ប្រទេសចិនកំពុងបិទរោងចក្រជាច្រើននៅក្នុងខេត្តស៊ីឈួន ដោយសារតែរលកកម្ដៅក្ដៅខ្លាំង និងគ្រោះរាំងស្ងួតនៅទូទាំងភាគខាងត្បូងនៃប្រទេសចិនជុំវិញអាងទន្លេយ៉ាងសេបង្កឱ្យខ្វះខាតអគ្គិសនី ។ ការបិទរោងចក្រនេះ គឺកើតឡើងបន្ទាប់ពីការបិទខ្ទប់ដោយសារជំងឺកូវីដ-១៩ កាលពីប៉ុន្មានខែមុននេះ ដែលបានរំខានដល់ខ្សែសង្វាក់ផ្គត់ផ្គង់ និងបង្ខំឱ្យក្រុមហ៊ុនផលិតបញ្ឈប់ប្រតិបត្តិការ។
យ៉ាងណាមិញថ្មីៗនេះ អាជ្ញាធរក្នុងខេត្តស៊ីឈួន បានបញ្ជាឱ្យរោងចក្របញ្ឈប់ប្រតិបត្តិការ ដើម្បីទប់ស្កាត់ការដាច់ចរន្តអគ្គិសនី ខណៈខេត្តនេះ ពឹងផ្អែកលើថាមពលវារីអគ្គីសនីប្រហែល ៨០% នៃតម្រូវការថាមពលរបស់ខ្លួន។ បើយោងតាមទិន្នន័យពី Everstream Analytics ដែលជាទិន្នន័យខ្សែសង្វាក់ផ្គត់ផ្គង់ និងអ្នកផ្តល់ការវិភាគហានិភ័យ បង្ហាញពីការកើនឡើងយ៉ាងខ្លាំងនៃការបិទរោងចក្រនៅក្នុងប្រទេសចិនកាលពីសប្តាហ៍មុន។ ជាក់ស្ដែងគិតត្រឹមថ្ងៃពុធ នេះ Everstream បានកត់ត្រាការបិទចំនួន ៣៩ ដែលច្រើនជាងទ្វេដងនៃចំនួនសរុបកាលពីសប្តាហ៍មុន។
គួរបញ្ជាក់ផងដែរថា ក្រុមហ៊ុនផលិតរថយន្តធំៗមួយចំនួនដែលត្រូវបញ្ឈប់ប្រតិបត្តិការនៅខេត្តស៊ីឈួន រួមមាន៖ ក្រុមហ៊ុនផលិតរថយន្តជប៉ុន Toyota និង CATL ដែលជាក្រុមហ៊ុនថ្មលីចូមយក្សរបស់ចិន។ ក្រុមហ៊ុនវត្ថុធាតុដើមសំខាន់ៗក៏ត្រូវរងការប៉ះពាល់ដែរ ហើយផលប៉ះពាល់នឹងហូរចូលតាមខ្សែសង្វាក់ផ្គត់ផ្គង់៕
អត្ថបទ៖ លីនី
ប្រភព៖ yahoo
រូបភាព៖ wp.com, assets.bwbx,