មជ្ឈមណ្ឌលស្ថិតិជាតិឡាវបានបង្ហាញថា អត្រាអតិផរណាក្នុងខែកក្កដា ឆ្នាំ២០២២ មានចំនួន ២៥,៦ % បើធៀបនឹងរយៈពេលដូចគ្នាកាលពីឆ្នាំមុន ហើយនេះគឺជាការកើនឡើងពី ២៣.៦% នៅក្នុងខែមិថុនា។ ដោយតួលេខនេះគឺជាអត្រាអតិផរណាខ្ពស់បំផុតចាប់តាំងពីកំណត់ត្រាបានចាប់ផ្តើមក្នុងឆ្នាំ ២០០០ ហើយមានឥទ្ធិពលយ៉ាងខ្លាំងទៅលើអ្នកដែលមានចំណូលទាប។ ក្នុងរយៈពេលប៉ុន្មានខែកន្លងមកនេះដែរ តម្លៃអាហារ ឱសថ ថ្លៃធ្វើដំណើរ និងទំនិញប្រើប្រាស់ក្នុងប្រទេសឡាវបានហក់ឡើងយ៉ាងខ្លាំង ជាពិសេស តម្លៃប្រេងឥន្ធនៈបានកើនឡើង ១០៦.៥% បើធៀបនឹងរយៈពេលដូចគ្នានៃឆ្នាំមុន និងប្រាក់គីបឡាវធ្លាក់ថ្លៃ វាជាកត្តាសំខាន់មួយទៀតដែលជំរុញឱ្យអតិផរណាកើនឡើង។
ហេតុនេះហើយទើបធ្វើឲ្យឡាវក្លាយជាប្រទេសដែលមានអតិផរណាខ្ពស់បំផុតនៅអាស៊ីអាគ្នេយ៍ ដែលពីមុនឡាវជាប្រទេសដែលនាំចូលផលិតផលច្រើនជាងការនាំចេញរួចទៅហើយ ហើយឥឡូវនេះ តម្រូវការរូបិយប័ណ្ណបរទេសក្នុងប្រទេសឡាវកំពុងកើនឡើងសម្រាប់ការនាំចូលទំនិញ និងការសងបំណុល ជាលទ្ធផលប្រាក់គីបបានធ្លាក់ថ្លៃបន្ថែមទៀត។ មិនត្រឹមតែប៉ុណ្ណោះរដូវវស្សានេះត្រូវបានគេរំពឹងទុកថា ផលិតផលកសិកម្មនឹងចេញមកតិចជាងធម្មតា នេះនឹងបណ្តាលឱ្យមានការថយចុះនៃបរិមាណទិន្នផលដែលត្រូវបានផ្គត់ផ្គង់ដល់ទីផ្សារ តម្លៃនៃផលិតផលទាំងនេះក៏នឹងកើនឡើងផងដែរ៕
អត្ថបទ៖ Bee
ប្រភព៖vientianetimes