អ្នកនាំពាក្យក្រសួងការបរទេសរុស្ស៊ី បាននិយាយកាលពីថ្ងៃព្រហស្បតិ៍ថា តម្លៃប្រេងអាចនឹងកើនឡើងកាន់តែខ្លាំង ប្រសិនបើក្រុមប្រទេសទាំង ៧ (G7) ព្យាយាមដាក់កំហិតលើការទិញប្រេងពីរុស្ស៊ី។ លោកស្រី Maria Zakharova បានប្រាប់សន្និសីទសារព័ត៌មានថា ផែនការរបស់ក្រុមប្រទេសទាំង ៧ គឺប្រឆាំងនឹងទីផ្សារ ហើយក៏បង្កហានិភ័យដែរ។
ជាមួយគ្នានេះនេះដែរ អ្នកនាំពាក្យក៏បានស្ដីបន្ទោសថា តម្លៃប្រេង និងឧស្ម័នដែលឡើងខ្ពស់ គឺមកពីកំហុសរបស់លោកខាងលិចនៅក្នុងគោលនយោបាយថាមពល ក៏ដូចជាការដាក់ទណ្ឌកម្មប្រឆាំងនឹងអ្នកផលិតថាមពលធំៗដូចជា រុស្ស៊ី អ៉ីរ៉ង់ និងវ៉េណេស៊ុយអេឡា។
មិនតែប៉ុណ្ណោះ ប្រធានាធិបតីរុស្ស៊ី វ្ល៉ាឌីមៀ ពូទីន ក៏បានព្រមានលោកខាងលិចកាលពីពេលថ្មីៗនេះថា ការបន្តដាក់ទណ្ឌកម្មប្រឆាំងនឹងរុស្ស៊ី ជុំវិញជម្លោះក្នុងប្រទេសអ៊ុយក្រែន ប្រថុយនឹងការបង្កើនតម្លៃថាមពល បង្កឱ្យមានគ្រោះមហន្តរាយសម្រាប់អ្នកប្រើប្រាស់ជុំវិញពិភពលោក។
គួរបញ្ជាក់ផងដែរថា ផែនការក្នុងការដាក់កំហិតលើការទិញប្រេងពីរុស្ស៊ី ត្រូវបានតាក់តែងឡើងជាលើកដំបូងកាលពីខែមុន ដោយរដ្ឋលេខាធិការរតនាគារអាមេរិក Janet Yellen ដែលជាផ្នែកនៃយុទ្ធនាការមួយដើម្បីបង្កើនសម្ពាធលើទីក្រុងម៉ូស្គូ ដើម្បីបញ្ចប់នូវអ្វីដែលវិមានក្រឹមឡាំងហៅថាជា “ប្រតិបត្តិការយោធាពិសេស” នៅអ៊ុយក្រែន។ យ៉ាងណាមិញ រូបរាងនៃកិច្ចព្រមព្រៀងចុងក្រោយ និងកម្រិតតម្លៃមិនទាន់ត្រូវបានប្រកាសនៅឡើយ ទេ ប៉ុន្តែសហរដ្ឋអាមេរិក និងសហភាពអឺរ៉ុបបានប្រកាសដាក់កំហិតលើការទិញប្រេងពីរុស្ស៊ី ជាមធ្យោបាយដាក់ទណ្ឌកម្មក្រុងម៉ូស្គូរួចទៅហើយ៕
អត្ថបទ៖ លីនី
ប្រភព៖ yahoo
រូបភាពពី៖ japantimes,yimg,icds.ee/wp-content