រដ្ឋាភិបាលកូរ៉េខាងត្បូងបានចាប់ផ្ដើមមិនពន្ធលើការនាំចូលសាច់ជ្រូក ខណៈពេលដែលប្រទេសកំពុងមានបញ្ហាអតិផរណា ដោយកាលពីថ្ងៃព្រហស្បតិ៍សាច់ជ្រូកចំនួន ៥០,០០០តោន ត្រូវបាននាំចូលប្រទេសមួយនេះក្រោមពន្ធសូន្យ។ យោងតាមការចុះផ្សាយរបស់សារព័ត៌មាន The Nation បានឱ្យដឹងថា នេះជាលើកដំបូងក្នុងរយៈពេល ១១ឆ្នាំដែលក្រសួងកសិកម្ម ស្បៀងអាហារ និងកិច្ចការជនបទកូរ៉េ ណែនាំកូតាពន្ធលើសាច់ជ្រូក និងអនុញ្ញាតឱ្យមានការនាំចូលទំនិញមួយចំនួនដោយមិនបង់ពន្ធ ឬក្នុងអត្រាពន្ធទាប។
ជាមួយនឹងពន្ធសូន្យនេះ ក្រសួងបានព្យាករណ៍ថា តម្លៃផលិតកម្មសាច់ជ្រូកនឹងធ្លាក់ចុះដល់កម្រិតពី ១៨.៤-២០ ភាគរយ ខណៈអត្រាពន្ធលើសាច់ជ្រូកនាំចូល គឺប្រហែល ២២.៥- ២៥%។ ក្រៅពីសាច់ជ្រូក រដ្ឋាភិបាលកូរ៉េនឹងមិនយកពន្ធលើទំនិញ ៦មុខទៀត រួមមាន ប្រេងផ្កាឈូករ័ត្ន និងស្រូវសាលី។
បើតាមអ្នកឃ្លាំមើលឧស្សាហកម្ម ការកើនឡើងនៃតម្លៃសាច់ជ្រូកនៅក្នុងប្រទេសកូរ៉េខាងត្បូង ត្រូវបានជំរុញដោយការលុកលុយរបស់រុស្ស៊ីលើអ៊ុយក្រែន រួមជាមួយនឹងអតិផរណា។ គួរបញ្ជាក់ផងដែរថា សាច់ជ្រូកដែលនាំចូលពីសហរដ្ឋអាមេរិក អេស្ប៉ាញ ហូឡង់ និងសហភាពអឺរ៉ុប ត្រូវបានរួចពន្ធរួចជាស្រេចក្រោមកិច្ចព្រមព្រៀងពាណិជ្ជកម្មសេរី លើកលែងតែសាច់នាំចូលពីប្រទេសកាណាដា ដែលត្រូវបង់ពន្ធនាំចូល ៨.៦%៕
អត្ថបទ៖ លីនី
ប្រភព៖ nationthailand