ប្រទេសជប៉ុន គឺជាប្រទេសមួយដែលតែងតែដាក់ដេញថ្លៃផលិតផល ដែលល្អ និងកម្របំផុតក្នុងតម្លៃរាប់ពាន់ដុល្លារ ខណៈផលិតផលខ្លះមានតម្លៃដល់ទៅរាប់ម៉ឺន រាប់សែនដុល្លារឯណោះ។​ ជាក់ស្ដែង នាពេលកន្លងមកជប៉ុនបានដាក់ដេញថ្លៃ ផ្លែឪឡឹក ត្រីធូណា និងស្រា ជាដើម ហើយកាលពីខែមេសា ឆ្នាំ២០២២ នេះ ជប៉ុនក៏បានដាក់ដេញថ្លៃផ្លែស្វាយ ១ប្រភេទ ចំនួន ២ផ្លែ ក្នុងតម្លៃជិត ៤ពាន់ដុល្លារ។

ផ្លែស្វាយដែលមានតម្លៃដ៏ថ្លៃនេះ ត្រូវបានគេចាត់ថ្នាក់ជាពូជពិសេសម្យ៉ាងឈ្មោះថា “Taiyo no Tamago” ឬ (ស៊ុតព្រះអាទិត្យ) មកពីខេត្ត Miyazaki ដោយដាក់ដេញថ្លៃក្នុងតម្លៃ ៥០០,០០០ យ៉េន (ប្រហែល ៣,៩៩០ ដុល្លារ) នៅក្នុងការដេញថ្លៃលើកដំបូងក្នុងឆ្នាំ២០២២​ នេះ នៅឯផ្សារលក់ដុំមួយនៅទីក្រុង Miyazaki ភាគនិរតីនៃប្រទេសជប៉ុន។

ចំពោះលក្ខណៈពិសេស ដែលធ្វើឱ្យផ្លែស្វាយ ១ប្រភេទនេះ អាចលក់បានថ្លៃក្នុងតម្លៃកប់ពពក គឺផ្លែស្វាយនេះ ត្រូវមានទម្ងន់យ៉ាងតិច ៣៥០ ក្រាម និងមានកម្រិតជាតិស្ករ ១៥% ឬខ្ពស់ជាងនេះ។ មិនតែប៉ុណ្ណោះ​ស្វាយនេះ ចាប់​ផ្ដើមប្រមូលផលខ្លាំង​នៅ​ចុង​ខែ​មេសា ហើយ​ឈាន​ដល់​កម្រិត​កំពូល​នៅ​ចុង​ខែ​ឧសភា​ដល់​ខែ​មិថុនា។

គួរបញ្ជាក់ផងដែរថា អ្នកដាំស្វាយនេះ មិនងាយស្រួលប៉ុន្មានឡើយ ពោលគឺក្រៅពីការថែទាំពិបាកហើយ ត្រូវចំណាយធនធានខ្ពស់ ប៉ុន្តែគុណភាពចេញមកគឺល្អឥតខ្ចោះតែម្ដង នេះបើយោងតាមការលើកឡើងរបស់លោក Tomohiro Ishikawa អ្នកគ្រប់គ្រងផ្នែកលក់ និងចែកចាយនៅសហករណ៍កសិកម្ម JA Miyazaki៕

អត្ថបទ៖ លីនី
ប្រភព៖ mainichi.jp