នាយករដ្ឋមន្រ្តីថៃលោក ប្រាយុធ ចានអូចា បានដាក់ចេញគោលនយោបាយថ្មីមួយនោះគឺ “ដើមឈើសម្រាប់ប្រាក់កម្ចី” ដែលអនុញ្ញាតឱ្យកសិករ ឬ ប្រជាពលរដ្ឋដាំដើមឈើដែលមានតម្លៃ ទុកជាវត្ថុបញ្ចាំដើម្បីទទួលប្រាក់កម្ចីពីធនាគារ។ ចំពោះដើមឈើ ដែលមានតម្លៃ និងអាចយកមកធ្វើជាវត្ថុ​បញ្ចាំ​បាន​រួម​មាន៖ ដើម​ឈើ​ទាក,ដើម​អម្ពិល,ដើម ebony,ដើម Burmese ebony ,ដើមទុរេន និង​ដើមខ្នុរ។

អ្នកនាំពាក្យរងរដ្ឋាភិបាល លោកស្រី Ratchada Thanadirek បាននិយាយកាលពីថ្ងៃអាទិត្យថា លោក ប្រាយុធ បានដឹងពីភាពជោគជ័យនៃគោលនយោបាយនេះ ពីនាយកដ្ឋានអភិវឌ្ឍន៍ពាណិជ្ជកម្ម ដែលបាននិងកំពុងអប់រំមេដឹកនាំសហគមន៍ជនបទ និងសហគ្រាសសហគមន៍អំពីអត្ថប្រយោជន៍នៃការដាំដើមឈើមានតម្លៃ។

លោកស្រីបានបន្ថែមថា៖ ” គម្រោងដាំដើមឈើនេះ គឺជាផ្នែកមួយនៃគោលនយោបាយរបស់លោក ប្រាយុធ ក្នុងការជំរុញតំបន់បៃតងនៅក្នុងប្រទេស ក៏ដូចជាផ្តល់ឱ្យអ្នកភូមិនូវមធ្យោបាយនៃការទទួលបានប្រាក់កម្ចីផងដែរ​ “។ ជាមួយគ្នានេះ នាយកដ្ឋានដែលស្ថិតនៅក្រោមយុត្តាធិការរបស់ក្រសួងពាណិជ្ជកម្មបាននិយាយថា អ្នកភូមិកាន់តែច្រើនកំពុងបង្ហាញចំណាប់អារម្មណ៍ចំពោះគម្រោងនេះ។

គិតត្រឹមថ្ងៃទី២០ ខែឧសភា ដើមឈើចំនួន ១៤៦,០០០ដើម ត្រូវបានចុះបញ្ជីជាវត្ថុបញ្ចាំសម្រាប់ប្រាក់កម្ចីដែលមានតម្លៃ ១៣៧ លានបាត (ប្រមាណ ៣.៨លានដុល្លារ)។ ក្នុង​នោះមាន ៣១៨ដើម ​បាន​ចុះ​បញ្ជី​ជាមួយ​ធនាគារ​កសិកម្ម និង​សហករណ៍​កសិកម្ម​សម្រាប់​កម្ចី​តម្លៃ ៣លាន​បាត (ប្រមាណ ៨ម៉ឺនដុល្លារ) ខណៈចំនួន ២៣,០០០ ដើម​បានចុះជាមួយ​ធនាគារ Krung Thai ក្នុង​តម្លៃ ១២៨ លាន​បាត (ប្រមាណ ៣.៦លានដុល្លារ) និង ១២០,០០០ដើម ​ជាមួយ​អង្គការ​ហិរញ្ញវត្ថុ​តូច​តម្លៃ ៦លាន​បាត (ប្រមាណ ១៦ម៉ឺនដុល្លារ)៕

អត្ថបទ៖ លីនី
ប្រភព៖ nationthailand