យោងតាមការចុះផ្សាយរបស់សារព័ត៌មាន The Nation បានឱ្យដឹងថា ទុរេនថៃត្រូវតាមលក្ខណៈវិនិច្ឆ័យទាំងអស់សម្រាប់ការនាំចេញទៅប្រទេសចិន។ កសិករដាំទុរេននៅប្រទេសថៃ ត្រូវបានសាទរចំពោះការយកចិត្តលើការអនុវត្តកសិកម្មល្អ (GAP) ដែលស្របតាមគោលនយោបាយ “Zero-Covid” របស់ប្រទេសចិន។
កាលពីថ្ងៃសុក្រ កន្លងទៅថ្មីៗនេះ ឯកអគ្គរដ្ឋទូតចិនប្រចាំប្រទេសថៃ លោក Han Zhiqiang បានទៅទស្សនាចម្ការទុរេន ដែលជាកម្មសិទ្ធិរបស់ប្រធានសមាគមធុរេនថៃ Phanusak Saiphanich ដើម្បីមើលថាតើមានវិធានការអ្វីខ្លះ ដើម្បីការពារផ្លែឈើពីការបំពុល។
ក្នុងនោះ Han លោករំពឹងថា ការនាំចេញទុរេនរបស់ថៃនឹងកើនឡើង ខណៈដែលអ្នកលក់អាចប្រើប្រាស់ផ្លូវដែកឡាវ-ចិន។ លោកក៏បានមានប្រសាសន៍ថា ទាំងប្រទេសចិន និងថៃគួរតែពន្លឿនការសាងសង់ផ្លូវរថភ្លើងផ្ទាល់ដើម្បីឲ្យវាកាន់តែងាយស្រួល និងថោកក្នុងការដឹកជញ្ជូនទំនិញ។
គួរបញ្ជាក់ផងដែរថា ប្រទេសថៃបាននាំចេញទំនិញកសិកម្មដែលមានតម្លៃ ១១,៣ ពាន់លានដុល្លារទៅប្រទេសចិនកាលពីឆ្នាំ២០២១ កើនឡើង ៣៣ ភាគរយធៀបនឹងឆ្នាំ២០២០។ ក្នុងចំណោមការនាំចេញ ផលិតផលទុរេនមានចំនួន ៥,៤៣ ពាន់លានដុល្លារ កើនឡើង ៨៧ ភាគរយពីមួយឆ្នាំទៅមួយឆ្នាំ៕
អត្ថបទ៖ លីនី
ប្រភព៖ nationthailand