រដ្ឋាភិបាលឥណ្ឌាបានហាមប្រាមការនាំចេញស្រូវសាលី ដើម្បីធានាឱ្យបាននូវការផ្គត់ផ្គង់ក្នុងស្រុកបានគ្រប់គ្រាន់ចំពេលតម្លៃកើនឡើង។ យោងតាមការចុះផ្សាយរបស់សារព័ត៌មាន NHK រដ្ឋាភិបាលឥណ្ឌាបានប្រកាសពីការហាមឃាត់ជាបន្ទាន់ លើការនាំចេញស្រូវសាលីនេះ កាលពីថ្ងៃសុក្រ ទី១៣ ខែឧសភា ឆ្នាំ២០២២ ថ្មីៗនេះ។
ទោះបីជាយ៉ាងណាក៏ដោយ រដ្ឋាភិបាលនិយាយថា ខ្លួននឹងអនុញ្ញាតឱ្យនាំចេញទៅកាន់ប្រទេសដែលប្រឈមនឹងការលំបាកក្នុងការធានាការផ្គត់ផ្គង់ ប្រសិនបើមានការស្នើសុំ។ គួរបញ្ជាក់ តម្លៃស្រូវសាលីបានកើនឡើងនៅជុំវិញពិភពលោកដោយសារតែការរំពឹងទុកថា ការផ្គត់ផ្គង់ពីប្រទេសរុស្ស៊ី និងអ៊ុយក្រែននឹងត្រូវបានរារាំងនៅពេលដែលរុស្ស៊ីបន្តការលុកលុយទៅលើអ៊ុយក្រែន។ ឥណ្ឌា ជាប្រទេសផលិតស្រូវសាលីធំជាងគេទីពីររបស់ពិភពលោក ដែលភាគច្រើនប្រើប្រាស់ក្នុងស្រុក។ ការឡើងថ្លៃស្រូវសាលីកំពុងជះឥទ្ធិពលដល់ជីវភាពរស់នៅរបស់ប្រជាជនរួចទៅហើយ៕
អត្ថបទ៖ លីនី
ប្រភព៖ nhk