ការនាំចេញផ្លែស្វាយស្រស់របស់ប្រទេសថៃបានកើនឡើងចំនួន ១១លានដុល្លារ ក្នុងរយៈពេលពីរខែដំបូងនៃឆ្នាំ២០២២នេះ ពោលគឺកើនឡើង ១៥% ធៀបនឹងរយៈពេលដូចគ្នាកាលពីឆ្នាំមុន នេះបើយោងតាមការចុះផ្សាយរបស់សារព័ត៌មាន Tha Nation។ ជាមួយគ្នានេះដែរ ម៉ាឡេស៊ីបាននាំចូលផ្លែស្វាយរបស់ប្រទេសថៃរហូតដល់ទៅ ៤៦% តាមពីក្រោយដោយកូរ៉េខាងត្បូង ៣៤% ជប៉ុន ៨% មីយ៉ាន់ម៉ា ៤% និងវៀតណាម ២%។
បើតាមអគ្គនាយកដ្ឋានចរចាពាណិជ្ជកម្មលោកស្រី Auramon Supthaweethum ផ្លែស្វាយថៃកំពុងពេញនិយមលើទីផ្សារទាំងនោះ គឺដោយសារគុណភាពល្អ រសជាតិផ្អែម និងរូបរាងស្អាត។ លើសពីនេះស្វាយស្រស់របស់ថៃមានពេញមួយឆ្នាំ ហើយមានច្រើនប្រភេទ។ លោកស្រីបានបន្ថែមទៀតថា ទីផ្សារផ្លែឈើកែច្នៃក៏កំពុងបន្ថែមទៅលើការច្នៃផ្លែស្វាយទៅជាផលិតផលផងដែរថាដូចជា ស្វាយក្រៀម និងកក ក៏ដូចជា បាយដំណើបស្វាយទុំ ដោយផលិតផលបែបនេះមិនមានពន្ធនាំចូលក្នុងទីផ្សារ FTA ចំនួន ១៦ឡើយ។
គួរបញ្ជាក់ផងដែរថា ប្រទេសថៃជាប្រទេសនាំចេញផ្លែស្វាយស្រស់ធំជាងគេទី៧ របស់ពិភពលោក ហើយក្នុងចំណោមពូជស្វាយថៃដែលពេញនិយមក្នុងទីផ្សារទាំងនោះមាន Nam Dokmai , Maha Chanok, Khiew Savoey, និង Chok Anan។ យ៉ាងណាមិញ លោកស្រី Auramon បានស្នើឱ្យប្រតិបត្តិករធុរកិច្ចថៃគួរតែកែលម្អ និងបង្កើនទម្រង់នៃផលិតផលរបស់ពួកគេសម្រាប់ការនាំចេញ ដើម្បីបន្ថែមតម្លៃកាន់តែច្រើន និងពង្រីកទីផ្សារ។ ជាមួយគ្នានេះការអភិវឌ្ឍគុណភាពផលិតផលគួរចាប់ផ្តើមពីដំណើរការដាំដុះរហូតដល់ការវេចខ្ចប់ មិនគួរប្រើសារធាតុគីមី និងថ្នាំសម្លាប់សត្វល្អិត ដើម្បីធ្វើឱ្យផលិតផលរបស់ពួកគេមានលក្ខណៈសរីរាង្គ និងអាចនាំចេញទៅកាន់ប្រទេសដែលតឹងរ៉ឹងចំពោះបញ្ហានេះ៕
អត្ថបទ៖ លីនី
ប្រភព៖ nationthailand