ប្រធានាធិបតីអ៊ុយក្រែនលោក Volodymyr Zelensky បាននិយាយកាលពីថ្ងៃព្រហស្បតិ៍ថា អ៊ុយក្រែនត្រូវការប្រាក់ចំនួន ៧ពាន់លានដុល្លារក្នុងមួយខែ ដើម្បីស្ដារ និងរក្សាសេដ្ឋកិច្ចរបស់ខ្លួនឱ្យនៅស្ថិតស្ថេរ ចំពេលមាន “ការខាតបង់សេដ្ឋកិច្ច” ដែលបង្កឡើងដោយប្រទេសរុស្ស៊ី។ នេះបើយោងតាមការចុះផ្សាយរបស់សារព័ត៌មាន kyivpost។
លោក Volodymyr Zelensky បានប្រាប់មេដឹកនាំធនាគារពិភពលោក និង IMF តាមរយៈខ្សែវីដេអូនៅក្នុងកិច្ចប្រជុំមួយថា៖ “យោធារុស្ស៊ីមានគោលបំណងបំផ្លាញអ្វីៗគ្រប់យ៉ាងនៅអ៊ុយក្រែន ដែលអាចបម្រើជាមូលដ្ឋានសេដ្ឋកិច្ចសម្រាប់ជីវិតរស់នៅ នោះរាប់បញ្ចូលទាំងស្ថានីយផ្លូវដែក ឃ្លាំងអាហារ ប្រេង និងរោងចក្រចម្រាញ់ប្រេង”។
ជាមួយគ្នានេះដែរ លោក Zelensky បានអំពាវនាវសុំជំនួយសព្វាវុធបន្ថែមទៀតដោយនិយាយថា អ៊ុយក្រែននៅតែមិនមានគ្រប់គ្រាន់ទោះបីជាមានជំនួយយោធារាប់ពាន់លានពីលោកខាងលិច ដែលបានបង្ខំឱ្យរុស្ស៊ីផ្តោតលើការវាយលុករបស់ខ្លួនឡើងវិញនៅឆ្ងាយពីទីក្រុង Kyiv និងឆ្ពោះទៅភាគខាងកើតក៏ដោយ៕
អត្ថបទ៖ លីនី
ប្រភព៖ kyivpost