យោងតាមការចុះផ្សាយរបស់សារព័ត៌មាន vnexpress បានឱ្យដឹងថា ឪឡឹក ផ្លែស្រកានាគ និងផលិតផលកសិកម្មផ្សេងទៀតកំពុងត្រូវបានលក់ក្នុងតម្លៃ ៣,០០០-៨០០០ ដុង (០.១៣-០.៣៥ ដុល្លារ) ក្នុងមួយគីឡូក្រាមនៅទីក្រុងហូជីមិញ និងហាណូយ ចាប់តាំងពីស្ថានភាពនាំចេញរបស់ចិននៅតែបន្តអាក្រក់ទៅៗ។
នៅក្នុងសង្កាត់ 12 របស់ទីក្រុង ហូជីមិញ, Binh Thanh, Go Vap និងទីក្រុងផ្សេងទៀត ឃើញថាអ្នកលក់ផ្លែឈើជាច្រើនបានដាក់លក់ជាហូរហែរនៅតាមចិញ្ចើមផ្លូវដោយលក់ក្នុងតម្លៃទាបបំផុត។ ជាកក់ស្ដែង លោក Cuong អ្នកលក់នៅស្រុក Tan Binh បាននិយាយថា “ជាធម្មតាឪឡឹកប្រភេទនេះត្រូវបានលក់ក្នុងតម្លៃ ២៥,០០០ ដុង (១.០៩ ដុល្លារ) ក្នុងមួយគីឡូក្រាមក្នុងប៉ុន្មានឆ្នាំថ្មីៗនេះ ប៉ុន្តែនៅឆ្នាំនេះ យើងលក់វាក្នុងតម្លៃតែពាក់កណ្តាលប៉ុណ្ណោះ ដោយសារកសិករមិនអាចនាំចេញបាន”។ ទន្ទឹមនឹងនេះដែរ អាជីវករម្នាក់នៅស្រុក Go Vap បាននិយាយថា គាត់លក់ស្ទើរតែមិនបានប្រាក់ចំណេញទេ ដោយសារតម្លៃដឹកជញ្ជូនខ្ពស់។
គួរបញ្ជាក់ផងដែរថា ការកកស្ទះកុងតឺន័រជាច្រើនគ្រឿងនៅព្រំដែនចិនបានអូសបន្លាយអស់រយៈពេលបីខែមកហើយ ដោយបង្ខំឱ្យអ្នកបើកបរត្រឡប់ទៅក្រុងវិញ ហើយលក់ទំនិញក្នុងតម្លៃពាក់កណ្តាល ឬមួយភាគបីនៃតម្លៃនាំចេញ ។ ជាមួយគ្នានេះនៅក្នុងខេត្ត Lang Son ភាគខាងជើង ដែលមានច្រកព្រំដែនសំខាន់ៗមួយចំនួន ឡានដឹកទំនិញចំនួន ១,៣៧៨ គ្រឿងបានជាប់គាំងគិតត្រឹមថ្ងៃច័ន្ទ ដោយចំនួនច្រើនជាងបីភាគបួននៃគឺដឹកផ្លែឈើ នេះបើយោងតាមភ្នាក់ងារគយ៕
អត្ថបទ៖ លីនី
ប្រភព៖ vnexpress