ប្រធានាធិបតី Joe Biden បានប្រកាសកាលពីថ្ងៃសុក្រថា សហរដ្ឋអាមេរិកនឹងហាមឃាត់ការនាំចូល vodka អាហារសមុទ្រ និងពេជ្រទាំងអស់ពីប្រទេសរុស្ស៊ី ដែលជាវិធានការចុងក្រោយបំផុតនៅក្នុងយុទ្ធនាការសេដ្ឋកិច្ចដែលកំពុងកើនឡើងដើម្បីដាក់ទណ្ឌកម្មប្រធានាធិបតី Vladimir Putin ចំពោះការឈ្លានពានអ៊ុយក្រែន។
លោក Biden បាននិយាយនៅក្នុងសុន្ទរកថាខ្លីពីសេតវិមានថា “ពូទីនគឺជាអ្នកឈ្លានពាន ហើយពូទីនត្រូវតែបង់ថ្លៃ” ។ លោកក៏បាននិយាយផងដែរថា សហរដ្ឋអាមេរិក និងសហភាពអឺរ៉ុបនឹងដកហូតសិទ្ធិពាណិជ្ជកម្មរបស់រុស្ស៊ី ដែលជាជំហានមួយដែលសមាជិកសភាជាច្រើននៅក្នុងសភាកំពុងស្វែងរក។ លោកបានបន្តទៀតថា៖ «វានឹងជាការវាយប្រហារដ៏អាក្រក់មួយទៀតដល់សេដ្ឋកិច្ចរុស្ស៊ី ដែលកំពុងរងទុក្ខយ៉ាងខ្លាំងពីការដាក់ទណ្ឌកម្មរបស់យើង»។
គួរបញ្ជាក់ថា សេដ្ឋកិច្ចរុស្ស៊ីកំពុងស្ថិតក្រោមភាពតានតឹងកាន់តែខ្លាំងឡើងពីការដាក់ទណ្ឌកម្មរបស់បស្ចិមប្រទេស ដែលកាត់ប្រទេសនេះចេញពីទុនបំរុងរូបិយប័ណ្ណបរទេស គួបផ្សំនឹងការកើនឡើងនូវការកើនឡើងនៃការចាក់ចេញរបស់ក្រុមហ៊ុនអាមេរិក និងអឺរ៉ុបពីប្រទេសរុស្ស៊ី។ ទណ្ឌកម្មក៏បានកំណត់គោលដៅលើមន្ត្រីរដ្ឋាភិបាលកំពូលរបស់រុស្ស៊ី និងឥស្សរជនផ្សេងទៀតដែលមានទំនាក់ទំនងជិតស្និទ្ធជាមួយលោក ពូទីន ដោយបង្កកទ្រព្យសម្បត្តិរបស់ពួកគេ ឬរឹបអូសភ្លាមៗ។ ជាមួយគ្នានេះប្រាក់រូប របស់រុស្ស៊ីបានធ្លាក់ចុះជាងពាក់កណ្តាល ចាប់តាំងពីវិមានក្រឹមឡាំងចូលឈ្លានពានអ៊ុយក្រែនកាលពីបីសប្តាហ៍មុន។
ទណ្ឌកម្មចុងក្រោយរបស់សហរដ្ឋអាមេរិក និងអឺរ៉ុបក៏បានហាមឃាត់ការនាំចេញទំនិញប្រណិតទៅកាន់ប្រទេសរុស្ស៊ីផងដែរ រួមមាននាឡិកា ឡាន និងគ្រឿងស្រវឹងកម្រិតខ្ពស់។ សេតវិមានបានប៉ាន់ប្រមាណថា ការនាំចេញទាំងនោះមានចំនួន ៥៥០លានដុល្លារក្នុងមួយឆ្នាំ។ ទណ្ឌកម្មថ្មីនេះក៏បើកទ្វារឲ្យអាមេរិកដាក់ពន្ធថ្មីលើទំនិញរុស្ស៊ី៕
អត្ថបទ៖ លីនី
ប្រភព៖ businessinsider