យោងតាមការចុះផ្សាយរបស់ក្រសួងព័ត៌មាន កាលពីថ្ងៃទី០៣ ខែមីនា ឆ្នាំ២០២២ នេះ សហព័ន្ធស្រូវអង្ករកម្ពុជា បានអះអាងថា ក្នុងរយៈពេល​ ៥ឆ្នាំចុងក្រោយ (២០១៧ -២០២១) នេះប្រទេសកម្ពុជាបាននាំអង្ករចេញទៅកាន់ប្រទេសរុស្សីបានចំនួន ១៧ ៥១២តោន។ ប្រភពដដែលបានបន្តថា សម្រាប់ឆ្នាំ ២០២១ បរិមាណដែលបានលក់ទៅកាន់ប្រទេសរុស្សីមាន ចំនួន​ ២​ ២២៣​ តោន ដែលគិតជាទឹកប្រាក់មានចំនួន ​១​ ៩៦៣​ ៦៤០​ ដុល្លារសហរដ្ឋអាមេរិក។

សហព័ន្ធស្រូវអង្ករកម្ពុជា បានឱ្យដឹងទៀតថា សម្រាប់ខែមករា និងខែកុម្ភៈ​ នៃឆ្នាំ២០២២ បរិមាណអង្ករដែលបាននាំចេញទៅកាន់ប្រទេសរុស្សី​មានចំនួនត្រឹមតែ ២០០តោន ដែលគិតជាទឹកប្រាក់មានចំនួន ២០០ ៦៤០​ ដុល្លារសហរដ្ឋអាមេរិក។

ប្រភពដដែលបានបន្ថែមថា ដោយឡែកការនាំអង្ករចេញទៅកាន់ប្រទេសអ៊ុយក្រែន មានបរិមាណតិចតួចបំផុតត្រឹមតែ ៥៧២តោនប៉ុណ្ណោះ ក្នុងរយៈពេល៥ឆ្នាំចុងក្រោយនេះ៕

ប្រភព៖ ក្រសួងព័ត៌មាន