យោងតាមការចុះផ្សាយរបស់ក្រសួងព័ត៌មានបានឱ្យដឹងថា ក្រុមហ៊ុន Renaissance Minerals Cambodia បានចម្រាញ់រ៉ែមាសចំនួន ១,៧៥១ គីឡូក្រាមគិតត្រឹមដើមខែកុម្ភៈ បន្ទាប់ពីប្រតិបត្តិការចម្រាញ់អស់រយៈពេល ៦ខែ។ ថ្លែងក្នុងពិធីសម្ពោធកំណាត់ផ្លូវជាតិលេខ៧ ក្នុងខេត្តក្រចេះ កាលពីថ្ងៃទី៧ ខែកុម្ភៈ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់ថា មាសដែលផលិតនៅខេត្តមណ្ឌលគិរី ក្នុងរយៈពេល៦កន្លងមកនេះបានឈានដល់ចំនួន ១,៧៥១ គីឡូក្រាម។

សម្តេចតេជោ ហ៊ុន សែន បន្ថែមថា ក្នុងមួយថ្ងៃ ក្រុមហ៊ុនអាចចម្រាញ់បានជិតមួយរយគីឡូក្រាម ដោយមាសដែល​ចម្រាញ់​ចេញពី​ក្រុមហ៊ុន Renaissance Minerals កម្ពុជា​ត្រូវ​បាន​នាំចេញ​ទៅ​អូស្ត្រាលី​ដើម្បី​ចម្រាញ់​បន្ត។ ក្នុងនោះសម្ដេចបានគូសបញ្ជាក់ថា កម្ពុជា​នៅ​មាន​សក្តានុពល​មាស និង​រ៉ែ​ផ្សេង​ទៀត​សម្រាប់​ការ​វិនិយោគ។

គួរបញ្ជាក់ផងដែរថា ក្រុមហ៊ុន Renaissance Minerals Cambodia បានចាប់ផ្តើមចម្រាញ់មាសនៅក្នុងខែមិថុនា ឆ្នាំ២០២១ ដោយក្លាយជាក្រុមហ៊ុនចម្រាញ់មាសពាណិជ្ជកម្មដំបូងគេនៅកម្ពុជា។ តាម​គម្រោង ក្រុមហ៊ុន​អាច​ផលិត​រ៉ែ​មាស​បាន​ប្រហែល ៣ តោន​ក្នុង​មួយ​ឆ្នាំ​ក្នុង​រយៈពេល ៨ ឆ្នាំ​ដំបូង៕

ប្រភព៖ ក្រសួងព័ត៌មាន