ប្រទេសថៃរំពឹងថា ខ្សែរថភ្លើងល្បឿនលឿនទី១ ប្រវែង ៨៧៣គីឡូម៉ែត្រ ដែលតភ្ជាប់ប្រទេសថៃទៅប្រទេសចិន នឹងចាប់ផ្ដើមប្រតិបត្តិការនៅឆ្នាំ២០២៦ នេះបើយោងតាមការលើកឡើងរបស់មន្ត្រីជាន់ខ្ពស់កាលពីថ្ងៃអង្គារ ទី១៨ ថ្មីៗនេះ។ ខ្សែរថភ្លើងនេះ ត្រូវបានសាងសង់ឡើងជា ២ដំណាក់ គឺដំណាក់កាលទីមួយតភ្ជាប់រាជធានីបាងកកទៅទីក្រុងនគររាជសីមាចម្ងាយប្រហែល ២០០ គីឡូម៉ែត្រ និងដំណាក់កាលទី២ តភ្ជាប់នគររាជសីមាជាមួយខេត្តណងខៃ ជាប់ព្រំប្រទល់ប្រទេសឡាវ ចម្ងាយប្រមាណ ៣៣០ គីឡូម៉ែត្រទៅខាងជើង។
បើតាមលោកស្រី Traisulee Traisaranakul អ្នកនាំពាក្យរងរដ្ឋាភិបាលបាននិយាយថា ដំណាក់កាលទីពីរបច្ចុប្បន្នកំពុងស្ថិតនៅក្រោមការវាយតម្លៃបរិស្ថាន ហើយត្រូវបានគេរំពឹងថានឹងចាប់ផ្តើមដំណើរការនៅឆ្នាំ២០២៨។ គម្រោងនេះធ្វើឡើងក្រោមគំនិតផ្តួចផ្តើមខ្សែក្រវាត់ និងផ្លូវដ៏ធំរបស់ប្រទេសចិន ដែលមានគោលបំណងតភ្ជាប់សេដ្ឋកិច្ចធំជាងគេទីពីររបស់ពិភពលោកដោយច្រករបៀងដី និងផ្លូវសមុទ្រ តភ្ជាប់ទៅកាន់អាស៊ីអាគ្នេយ៍ ,កណ្តាល និងអាស៊ីខាងត្បូង ទៅនិងអាស៊ីកណ្តាល ព្រមទាំងផ្លូវសមុទ្របើកពាណិជ្ជកម្មជាមួយមជ្ឈិមបូព៌ា និង អឺរ៉ុប។
ជាមួយគ្នានេះដែរ នៅដើមខែធ្នូ ផ្លូវដែកតភ្ជាប់រវាងឡាវ និងចិនបានចាប់ផ្តើមប្រតិបត្តិការ។ លោកស្រី Traisulee បាននិយាយថា ពាណិជ្ជកម្មនៅព្រំដែនថៃ-ឡាវក្នុងខែនោះបានកើនឡើងដល់ ៦,៩ ពាន់លានបាត (២០៨,៨៤ លានដុល្លារអាមេរិក) ធៀបនឹង ៤,៦៤ ពាន់លានបាតក្នុងខែធ្នូ ឆ្នាំ ២០២០។ គួរបញ្ជាក់ថា ក្រុមហ៊ុនរដ្ឋរបស់ថៃ និងចិនបានចុះហត្ថលេខាលើកិច្ចព្រមព្រៀងដែលមានតម្លៃ ៥.២ ពាន់លានបាតសម្រាប់គម្រោងនេះក្នុងឆ្នាំ២០១៧ ប៉ុន្តែមានការពន្យារពេលដោយសារការខ្វែងគំនិតគ្នាលើការរចនា ហិរញ្ញប្បទាន និងជំនួយបច្ចេកទេស៕
អត្ថបទ៖ លីនី
ប្រភព៖ channelnewsasia