យោងតាមការចុះផ្សាយរបស់សារព័ត៌មាន vietnamplus បានឱ្យដឹងថា វៀតណាមបានចាប់ផ្ដើមសាងសង់រោងចក្រផលិតអាគុយ VinES ដែលមានតម្លៃ ៤ទ្រីលានដុង (ជិត ១៧៣.៧ លានដុល្លារអាមេរិក) ហើយកាលពីថ្ងៃទី១២ ខែធ្នូ នៅតំបន់សេដ្ឋកិច្ច Vung Ang ភាគកណ្តាលខេត្ត Ha Tinh។

ទទួលបានហិរញ្ញប្បទានដោយក្រុមហ៊ុនឯកជន Vingroup រោងចក្រនេះនឹងត្រូវបានអភិវឌ្ឍលើផ្ទៃដី ៨ហិកតាក្នុងដំណាក់កាលដំបូងរបស់ខ្លួន ដោយនឹងត្រូវផ្គត់ផ្គង់អាគុយលីចូមសម្រាប់រថយន្តអគ្គិសនី និងរថយន្តក្រុងរបស់ VinFast ។

នៅក្នុងពិធីបើកការដ្ឋាននេះ លោក Nguyen Xuan Phuc នាយករដ្ឋមន្រ្តីវៀតណាមបានលើកឡើងថា ជោគជ័យរបស់ Vingroup កំពុងលេចឡើងជាបណ្តើរៗនៃក្រុមឧស្សាហកម្ម និងបច្ចេកវិទ្យា ដែលមិនត្រឹមតែបង្កើតការបំផុសគំនិតសម្រាប់ក្រុមសេដ្ឋកិច្ចផ្សេងទៀតក្នុងប្រទេសវៀតណាមប៉ុណ្ណោះទេ ថែមទាំងដើរតួនាទីយ៉ាងសំខាន់ក្នុងការបង្កើតប្រព័ន្ធអេកូឡូស៊ី “Make-in-Vietnam” លើការផលិត កែច្នៃឡើងវិញ និងការប្រើប្រាស់ថ្មថាមពលកកើតឡើងវិញ។

លើសពីនេះ ការចាប់យក និងអភិវឌ្ឍបច្ចេកវិទ្យាថ្មយ៉ាងសកម្មគឺជាធាតុផ្សំដ៏សំខាន់ដើម្បីជួយ VinFast ឱ្យសម្រេចបានយ៉ាងឆាប់រហ័សនូវគោលដៅយុទ្ធសាស្ត្ររបស់ខ្លួនក្នុងការក្លាយជាក្រុមហ៊ុនរថយន្តអគ្គិសនីឆ្លាតវៃទូទាំងពិភពលោក។ ការផលិតថ្មដោយខ្លួនឯងនឹងធានាបាននូវការផ្គត់ផ្គង់អាគុយចម្រុះ និងសមរម្យសម្រាប់ខ្សែនីមួយៗនៃរថយន្តអគ្គិសនី VinFast ខណៈពេលដែលបំពេញតម្រូវការថ្មរបស់ទីផ្សាររថយន្តអគ្គិសនីក្នុងស្រុក និងអន្តរជាតិបានប្រសើរជាងមុន ដែលរួមចំណែកដល់បដិវត្តរថយន្តអគ្គិសនីសកល។

គួរឱ្យដឹងថា ហេដ្ឋារចនាសម្ព័ន្ធទាំងមូលរបស់រោងចក្រ រួមទាំងផ្នែកកាត់ ផ្នែកផ្សារដែក និងផ្នែកវេចខ្ចប់ (កញ្ចប់អាគុយ) ត្រូវបានសាងសង់ឡើងដើម្បីផលិតកញ្ចប់ថ្ម ១០០,០០០ ក្នុងមួយឆ្នាំ។ ដំណាក់កាលទីពីរ នៃរោងចក្រនឹងពង្រីកការផលិតដើម្បីរួមបញ្ចូលការផលិតធាតុថ្ម និងបង្កើនសមត្ថភាពដល់កញ្ចប់អាគុយមួយលាន ក្នុងមួយឆ្នាំ៕

(រូបតំណាង)

អត្ថបទ៖ លីនី
ប្រភព៖ vietnamplus