យោងតាមការចុះផ្សាយរបស់ក្រសួងព័ត៌មានបានឱ្យដឹងថា អភិបាលខេត្តបន្ទាយមានជ័យ និងខេត្តបាត់ដំបងនៃព្រះរាជាណាចក្រកម្ពុជា បានជួបប្រជុំពិភាក្សាជាមួយ អភិបាលខេត្តស្រះកែវ នៃព្រះរាជាណាចក្រថៃ កាលពីរសៀលថ្ងៃ៦រោច ខែកត្តិក ឆ្នាំឆ្លូវ ត្រីស័ក ព.ស. ២៥៦៥ ត្រូវនឹថ្ងៃ ព្រហស្បតិ៍ ទី២៥ ខែវិច្ឆិកា ឆ្នាំ២០២១ នៅទីស្នាក់ការអន្តរជាតិ ក្លងលឹក ស្រុកអារ័ញ្ញ ខេត្តស្រះ កែវ ដើម្បីបន្តពង្រឹងកិច្ចសហប្រតិបត្តិការ សម្ព័ន្ធមេត្រីភាព និងដើម្បីឈានដល់ការបើកច្រក ព្រំដែនអន្តរជាតិ និងច្រកតំបន់តាមបណ្តោយព្រំដែនរវាងខេត្ត នៃប្រទេសទាំង២ឡើងវិញ ។
ប្រតិភូកម្ពុជាដឹកនាំដោយឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងឯកឧត្តម សុខ លូ អភិបាលខេត្តបាត់ដំបង។ ដោយឡែកភាគីថៃដឹកនាំដោយឯកឧត្តម បរិនបញ្ញា ភោធិ សាធ អភិបាលខេត្តស្រះកែវ ព្រមទាំងមានការចូលរួមពីមន្ត្រីពាក់ព័ន្ធ និងកងកម្លាំប្រដាប់អា វុធជាច្រើនរូបទៀតផង។
ក្នុងកិច្ចប្រជុំភាគីទាំង២ បានធ្វើការពិភាក្សា ដើម្បីឈានដល់ការបើកច្រកជាប់ព្រំដែន ខេត្តបន្ទាយមានជ័យ រួមមាន៖ ច្រកទ្វារអន្តរជាតិប៉ោយប៉ែត, ច្រកម៉ាឡៃ, ច្រកបឹងត្រកួន, រីឯ ខេត្តបាត់ដំបង គ្រោងបើកច្រកទ្វារអន្តរជាតិ គីឡូ១៣ ស្រុកសំពៅលូន ។
នៅក្នុងកិច្ចប្រជុំនោះដែរ ភាគីកម្ពុជាបានស្នើសុំឱ្យចេញ-ចូលប្រជាពលរដ្ឋទៅធ្វើការ ព្រឹកវិលល្ងាច១ថ្ងៃត្រឹម៣ ០០០នាក់ ពោលចេញ-ចូលម៉ោង៦ព្រឹក ដល់ម៉ោង១០យប់ អ្នកអូស រទេះ ១ថ្ងៃអនុញ្ញាតត្រឹម៣០០ជើងក្នុង១រទេះ តែត្រូវអនុវត្តតាមវិធានការណែនាំរបស់ក្រសួង សុខាភិបាលជានិច្ច។ សម្រាប់ពលករដែលមានប័ណ្ណឆ្លងព្រំដែន ត្រូវអនុញ្ញាតរយៈពេល៣ខែ សម្រាប់ធ្វើកសិកម្ម តាមបន្ទាត់ព្រំដែន។
ក្នុងកិច្ចប្រជុំពិភាក្សានេះ ខាងភាគីថៃបានទទួលយកសំណើកិច្ចពិភាក្សា ដើម្បីស្នើសុំ បន្តទៅថ្នាក់ដឹកនាំរាជរដ្ឋាភិបាលថៃរបស់ពួកគេ ដើម្បីសម្រេចពេលក្រោយហើយកម្ពុជានឹង ស្នើសុំគោលការណ៍ឯកភាពពីប្រមុខរាជរដ្ឋាភិបាលផងដែរ ៕
ប្រភព៖ ក្រសួងព័ត៌មាន