យោងតាមលោក Thanusak Pheungdet សភាពាណិជ្ជកម្មថៃ បានឱ្យដឹងកាលពីចុងសប្ដាហ៍មុនថា កម្មវិធី «Phuket sandbox» បានទាក់ទាញភ្ញៀវទេសចរបរទេសជាង ១៩,០០០ នាក់និងបង្កើតចំណូលជាង ១ពាន់លានបាតសម្រាប់ខេត្តនេះ។ លោកបានបន្តថា ភ្ញៀវទេសចរបរទេសប្រហែល ៤,០០០ នាក់បានត្រលប់ទៅផ្ទះវិញហើយ ខណៈប្រហែល ១៥,០០០នាក់កំពុងស្នាក់នៅភូកេត ដោយស្នាក់នៅក្នុងសណ្ឋាគារពី ៧,០០០ ទៅ ៨,០០០ បន្ទប់ និងបានបង្កើតចំណូលជាង ១ ពាន់លានបាត (ប្រមាណ ៣០លានដុល្លារ) សម្រាប់អាជីវកម្មក្នុងស្រុក។

ជាមួយគ្នានេះ លោកបាន​បន្ថែមថា សហគ្រិននៅភូកេតមានគម្រោងរៀបចំសកម្មភាពផ្សេងៗដើម្បីទាក់ទាញភ្ញៀវបរទេសក្រៅពីភ្ញៀវទេសចរបែបកម្សាន្តដូចជា ព្រឹត្តិការណ៍កីឡា សន្និបាត និងព្រឹត្តិការណ៍វប្បធម៌នៅចុងឆ្នាំនេះ។ ព្រឹត្តិការណ៍ទាំងនេះក៏នឹងត្រូវការវិធានការត្រួតពិនិត្យយ៉ាងតឹងរ៉ឹងដើម្បីការពារអ្នកទស្សនាឱ្យមានសុវត្ថិភាព ជៀសផុតពីជំងឺកូវីដ-១៩ ផងដែរ។

សូមររម្លឹកថា គម្រោង «sandbox» បានចាប់ផ្តើមនៅថ្ងៃទី០១ ខែកក្កដា ក្នុងគោលបំណងបើកភូកេតឡើងវិញ ដល់ភ្ញៀវបរទេសដើម្បីស្តារឧស្សាហកម្មទេសចរណ៍ក្នុងស្រុកឡើងវិញ។ អ្នកទេសចរដែលទទួលថ្នាំបង្ការអាចហោះហើរចូលភូកេត ហើយធ្វើដំណើរជុំវិញខេត្តដោយសេរីដោយមិនចាំបាច់ធ្វើចត្តាឡីស័ក។ បន្ទាប់ពីចំណាយពេល ១៤ ថ្ងៃនៅភូកេត ហើយប្រសិនបើពួកគេនៅតែធ្វើតេស្តអវិជ្ជមាននោះ ភ្ញៀវទេសចរអាចធ្វើដំណើរទៅកាន់តំបន់ផ្សេងទៀតនៃប្រទេសថៃបាន៕

អត្ថបទ៖ លីនី
ប្រភព៖ nationthailand