សហរដ្ឋអាមេរិក នឹងផ្តល់ជំនួយដល់ប្រទេសថៃចំនួន ៣០ លានដុល្លារដើម្បីដោះស្រាយបញ្ហា Covid-19 នេះបើយោងតាមការចុះផ្សាយរបស់សារព័ត៌មាន THE NATION។ សារព័ត៌មានដដែលបានចុះផ្សាយថា សេចក្តីប្រកាសព័ត៌មានរបស់ស្ថានទូតអាមេរិកបាននិយាយកាលពីថ្ងៃពុធថា អនុរដ្ឋលេខាធិការសហរដ្ឋអាមេរិកលោកស្រី Wendy R Sherman បានរំលឹកឡើងវិញនូវការប្តេជ្ញាចិត្តរបស់សហរដ្ឋអាមេរិកចំពោះប្រជាជនថៃក្នុងការប្រយុទ្ធប្រឆាំងនឹងវីរុស Covid-19 ដែលរួមមានទឹកប្រាក់ចំនួន ៣០ លានដុល្លារ ជាជំនួយដែលទាក់ទងនឹងការដោះស្រាយ Covid-19 ដល់ព្រះរាជាណាចក្រថៃ។

សេចក្តីថ្លែងការណ៍ក៏បាននិយាយថាលោកស្រី Sherman បានបញ្ជាក់សារជាថ្មីពីសារៈសំខាន់ដ៏សំខាន់របស់សហរដ្ឋអាមេរិកចំពោះទំនាក់ទំនងសេដ្ឋកិច្ចសន្តិសុខនិងវប្បធម៌ទ្វេភាគីរវាងប្រទេសទាំងពីរ ដែលមានរយៈពេលជាងពីរសតវត្សរ៍ ហើយបានគូសបញ្ជាក់អំពីកិច្ចសហប្រតិបត្តិការសុខភាពរាប់ទសវត្ស។

ទន្ទឹមនឹងនោះ ភាគីទាំងពីរបានឯកភាពគ្នាអំពីសារៈសំខាន់នៃចំណងមិត្តភាពអាមេរិក-ថៃ ក្នុងការដោះស្រាយបញ្ហាសេដ្ឋកិច្ចនិងសន្តសុខក្នុងតំបន់រួមមាន វិបត្តិនៅមីយ៉ាន់ម៉ា បញ្ហាតំបន់មេគង្គ និងការរីករាលដាលនៃវីរុសរាតត្បាត។ គួររម្លឹកផងដែរថា លោកស្រី Sherman បានធ្វើទស្សនកិច្ចនៅប្រទេសថៃនៅថ្ងៃទី១ និងទី២ ខែមិថុនាសម្រាប់ “ កិច្ចពិភាក្សាជាយុទ្ធសាស្ត្រ” ជាមួយនាយករដ្ឋមន្រ្តី ប្រាយុធ ចានអូចា ឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេស Don Pramudwinai និងតំណាងមកពីអង្គការអន្តរជាតិនានា៕

អត្ថបទ៖ លីនី
ប្រភព៖ nationthailand