សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងតំណាក់កាលនេះ បានបញ្ចេញស្បៀងអាហារ ដើម្បីចែកជូនពលរដ្ឋយ៉ាងច្រើនសន្ធឹកសន្ធាប់ មិនធ្លាប់មាននាពេលកន្លងមក។ សកម្មភាពបែបនេះ របស់សម្ដេចតេជោនាយករដ្ឋមន្រ្តី មានគោលបំណងតែមួយគត់ គឺចង់ជួយចែករំលែកការលំបាករបស់ប្រជាពលរដ្ឋ ចៀសអោយផុតពីជម្ងឺកូវីដ-១៩ ។
ទាំងនេះជាការលើកឡើងរបស់លោកឃួង ស្រេង អភិបាលរាជធានីភ្នំពេញ ក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ តាមរយៈ ប្រព័ន្ធ video ដែលបានប្រារព្ធធ្វើឡើងកាលពីរសៀលថ្ងៃទី០៧ ឧសភា ឆ្នាំ២០២១ នៅសាលារាជធានីភ្នំពេញ ដើម្បីជំរុញឲ្យការងារនៃការបង្ការទប់ស្កាត់នូវជំងឺកូវីដ-១៩ កាន់តែមានប្រសិទ្ធភាពថែមទៀត អាចឈានទៅកាត់ផ្ដាច់បាន នូវការរីករាលដាលនៃជម្ងឺកាចសាហាវនេះ។
ឯកឧត្តម ឃួង ស្រេង ក្នុងឱកាសនោះក៏បានណែនាំថា តំបន់ក្រហម ក្រៅពីការបិទខ្ទប់ហើយ កម្លាំងត្រូវល្បាតខាងក្នុង ជាមួយនិងការដាក់មីក្រូផ្សព្វផ្សាយ អោយពួកគាត់ចូលរួមអនុវត្តទៅតាមការណែនាំរបស់រាជរដ្ឋាភិបាលក្រសួង សុខាភិបាលនិងអាជ្ញាធរ សំដៅធ្វើយ៉ាងណា កុំអោយរីករាលដាលជម្ងឺកូវីដ-១៩នេះ នៅក្នុងតំបន់ និងទៅក្រៅតំបន់ ។ ជាងនេះទៀតក៏ត្រូវមើលពីបញ្ហាជីវភាពរបស់ប្រជាពលរដ្ឋ បើមានការខ្វះខាតយើងជួយផ្តល់ជូនពួកគាត់ភ្លាម។
ចំពោះវិធានការបិទខ្ទប់នៅតំបន់ក្រហមនេះដែរ ឯកឧត្តម ឃួង ស្រេង ក៏បានណែនាំអោយអាជ្ញាធរខណ្ឌទាំងអស់ដែល មូលដ្ឋានរបស់ខ្លួនមានតំបន់ក្រហមត្រូវអនុវត្តការងារកុំតឹងរឹងពេក ហើយក៏កុំធូរពេកដែរមានន័យថា បើពួកគាត់មានការចាំបាច់ មាននៅក្នុងការសម្រេចរបស់រាជរដ្ឋាភិបាល សម្រួលអោយពួកគាត់បានចេញ ចូលទៅ។
គួរបញ្ជាក់ដែរថា ក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ តាមរយៈប្រព័ន្ធ video កាលពីថ្ងៃម្សិលមិញនេះ អភិបាលខណ្ឌពាក់ព័ន្ធមួយចំនួន ក៏បានរាយការណ៍អំពីស្ថានភាពនានានៅក្នុងមូលដ្ឋានរបស់ខ្លួន ជុំវិញការវិវត្តនានានៃជំងឺកូវីដ-១៩ ដើម្បីយកចំណុចទាំងនោះ មកពិភាក្សាគ្នា ស្វែងរកចំណុចល្អៗ ដែលធ្វើយ៉ាងណា ដែលអាចឈានទៅដល់ការផ្តាច់ជម្ងឺកូវីដ-១៩ បានជោគជ័យ នៅពេលដ៏ខ្លីខាងមុខនេះ៕
ប្រភព៖ ក្រសួងព័ត៌មាន