ក្រោមជំនួយឥតសំណងរបស់រដ្ឋាភិបាលជប៉ុន តាមរយៈទីភា្នក់ងារសហប្រតិបត្តិការអន្តរជាតិជប៉ុន(JICA) ក្នុងទំហំទឹកប្រាក់ប្រមាណជា ៣០ លានដុល្លារដើម្បីសាងសង់វិទ្យាស្ថានគរុកោសល្យនៅរាជធានីភ្នំពេញ និងខេត្តបាត់ដំបងក្នុងការដាក់ឱ្យប្រើប្រាស់ជាផ្លូវការ។ នេះបើយោងតាមផេកផ្លូវការរបស់ JICA ប្រចាំកម្ពុជាកាលពីថ្ងៃទី ២៥ ខែមករា ឆ្នាំ ២០២១ ។ បើតាម JICA បានគូសបញ្ជាក់ថា ពិធីប្រគល់អគារថ្មីប្រារព្ធធ្វើឡើងពីរផ្សេងគ្នា ដោយមួយធ្វើឡើងនៅវិទ្យាស្ថានគរុកោសល្យរាជធានីភ្នំពេញ នៅថ្ងៃទី ១២ ខែមករា ឆ្នាំ ២០២១ ។ ដោយឡែក វិទ្យាស្ថានគរុកោសល្យខេត្តបាត់ដំបងនៅថ្ងៃទី ១៥ ខែមករា ឆ្នាំ ២០២១ ដែលមានសមាសភាពចូលរួមពីតំណាងក្រសួងអប់រំ យុវជន និងកីឡា ការិយាល័យ JICA ប្រចាំកម្ពុជា ទីប្រឹក្សាគម្រោងក្រុមហ៊ុនសាងសង់ និងតំណាងវិទ្យាស្ថានគរុកោសល្យ ទាំងពីរផងដែរ។
ចំពោះការរៀបចំពិធីនេះឡើង គឺដើម្បីបញ្ជាក់ពីការប្រគល់អគារថ្មីជាផ្លូវការជូនដល់ក្រសួងអប់រំ យុវជន និងកីឡាក្រោយពីការសាងសង់បានបញ្ចប់ជាស្ថាពរ ហើយបន្ទាប់កម្មវិធីរួចអគារថ្មីទាំងនោះអាចប្រើប្រាស់បានតាមការគួរ។ ជាមួយគ្នានេះ JICA សម្ដែងនូវសេចក្តីត្រេកអរ និងតែងតែចង់ឃើញអគារទាំងនោះជាអគារថ្មីមានគុណភាពល្អ ដែលជាការសងសង់ក្រោមគម្រោងជំនួយឥតសំណងក្នុងទំហំទឹកប្រាក់ ៣,១៧០ លានយ៉េន (ស្មើនឹងប្រមាណ ៣០ លានដុល្លាអាម៉េរិក)។
តាមរយៈគម្រោងនេះ JICA មានភាពជឿជាក់យ៉ាងមុតមាំថា មូលដ្ឋានដែលជាតម្រូវការចាំបាច់សម្រាប់វិទ្យាស្ថានគរុកោសល្យទាំងពីរ ត្រូវបានកែលម្អដើម្បីអាចប្រែក្លាយខ្លួនទៅជាគ្រឹះស្ថានផ្តល់ការអប់រំកម្រិតបរិញ្ញាបត្ររយៈពេល ៤ ឆ្នាំបន្ទាប់ពីបានពង្រីកអគារដែលមានស្រាប់របស់មជ្ឈមណ្ឌលគរុកោសល្យ និងសាលាគរុកោសល្យ។ ដូចនេះជាលទ្ធផល គម្រោងនេះនឹងអាចចូលរួមចំណែកលើកកម្ពស់គុណភាព ការអប់រំនៅបឋម និងមធ្យមសិក្សាបឋមភូមិតាមរយៈការលើកកម្ពស់គុណភាពគ្រូបង្រៀន៕
ប្រភព៖ ក្រសួងព័ត៌មាន